6 сентябрьыште Марий Эл Республикын калык писательже, Российысе журналист-влак ушемын да Российысе писатель-влак ушемын еҥже Юрий Иванович Галютин-Ялзакын ӱмыржӧ кӱрылтын. Юрий Иванович 1940 ий 1 майыште Морко район Усола ялеш служащий-влакын ешыштыже шочын. 1958-1960 ийлаште Н.К.Крупская лӱмеш Марпединститутышто тунемын. Тӱрлӧ редакцийыште пашам ыштен: Марий Турек
районысо «Знамя», «Марий коммуна» газетлаште, Марий книга савыктышыште, «Пачемыш» журналыште, варажым «Марий Эл» газетыште тӱвыра да литератур пӧлкам ятыр жап вуйлатен. «Ончыко» журналын литературный редакторжо лийын.
Икымше почеламутым Ю.Галютин школышто тунеммыж годымак возен, тудым районысо да республикысе газет ден журналлаште савыктеныт. 1969 ийыште
«Ит ӧпкеле» икымше почеламут сборникше лектын.
Ю.И.Галютинын уке лиймыже – тӱвыраште кугу йомдарымаш. Лишыл еҥжылан да родо-тукымжылан чаманымашым каласена. Тудо талантан писатель, поэт, журналист, профессионал лийын.
Лишыл еҥын колымыжо – кугу ойго, чытымашым йодеш. Шке илышыжым чын да кӱлеш семын илыше еҥ нерген поро шарнымаш ила, шкеж деч вара поро шӱлышан
саскам кода. Тудо мыланна профессионал пашаште волгыдо тул да корным виктарыше семын лиеш. Ме тудым порын шарнена. М.З.Васютин, К.А.Иванов, М.И.Матвеев, И.Г.Садовин, А.С.Абдулов, Э.А.Иманаев, Л.П.Ягодарова, С.Д.Архипова, Ю.И.Соловьев, И.Г.Попов, Г.Л.Сабанцев, А.Т.Тимиркаев, В.Н.Бердинский, И.И.Лобанов, А.А.Богданов, В.М.Горохов, Л.Л.Яндаков, Е.А.Юнусова, Ю.В.Цветкова.