Сай лектышым налаш манын, чеснокым шыжым шындаш сайрак. Тидын шотышто икмыняр ойкаҥашым шотыш налман.
- Чеснокым йӱштӧ толмо деч 35-40 кече ончыч, 20 сентябрь гыч октябрь кыдал марте, шынден шуктыман. Мланде кылмыме деч ончыч тудо 10-12 см келгытыш вожым колтен шукта.
- Кияр, шере пурыс, баклажан, кабачок, эр шушо, цветной ковышта, отызан да пырчан культур-влакым куштымо йыраҥыште чеснокым шындаш кӱлеш. Чеснокым ончычсо верышкыже але шоган олмышко ида шынде. Ончычсо верышкыже тудым кум але ныл ий гыч веле гына шындаш лиеш.
- Шындыме деч ончыч сай пӱйжым ойыркалыман да ломыж вӱдыштӧ 2 шагат шинчыктыман. Ты растворым ышташ манын, 2 литр вӱдыш 400 грам ломыжым ешарыман да пел шагат шолтыман. Вара йӱкшаш кодыман. Тудын олмеш 2 минутлан шинчалан вӱд растворышто кучаш лиеш. Тидлан 5 литр вӱдыш 3 кугу совла шинчалым пыштыман.
- Чеснокым шыжым 5-6 см келгытышке шындыман. Нормо почеш, 1 кв м.мландылан 45-50 пӱй кӱлеш.
- Йӱштӧ деч аралаш манын, 2-3 см лончо пургыжым, торфым пышташ але вес материал дене леведаш лиеш.