Черын нелытшым тудым чытыше гына пала

Шучко чер тӱня мучко озалана. Но ме тудын лӱдыкшыжым эше чыланак умылен шуктен огынал. Кӧжӧ умылаш ок тырше. А кӱлеш! Умылен да вирус деч кӱлеш семын аралалтын гына тиде лӱдыкшым чактарен сеҥена.

Коронавируслан кӧра кызыт США-ште, Испаний, Италий да моло элыште поснак кугу нелылыкыш логалыныт. Тушто черын лӱдыкшӧ улмыжым умыленыт! Мемнан денат тусо гай туткар марте шуаш огыл манын, ме кажныже тидлан айста чаракым ышташ тыршена.

Корнын кужытшым тудым эртыше еҥ пала, маныт, а черын нелытшым — тудым чытыше. Италий гыч палыме марий ӱдырамашын возымыжым темлена.

— Черын лӱдыкшӧ улмыжым калыклан палдарашак тыршыза. Умылыза, нимогай мыскара уке. Ончыч тыге лийын кертеш манын меат ӱшанен огынал. А таче кузе лияш да мом ышташ огына пале?!  Тыгайым ужын чалемме марте шуаш лиеш, жап деч ончыч шоҥгемат! Пеш шучко сӱрет Италийыште. Черле-влак шукын улыт, а эмлаш вер ок сите. Колышо пеш шуко, моргышто вер уке.

Чыла тидым ужын, мый тыште шортам, мӧҥгыштӧ (Марий Эл, Волжский район. – Авт.) улшо-влак деке йыҥгыртем, умылтарем, а нуно воштылыт. «Авай, тыйже тынарак ит ӧркӧ, чыла сай лиеш», — маныт. А кушто сайже? Кунам тудо лиеш?

Тыште, Италийыште, пашашке кок кечылан ик гана миен толам. Полиций чыла терга, спецдокумент дене гына кошташ лиеш. Тергымым, мемнан верч весын решатлымым ида вучо: шкендам шке аралыза! Аралалтса!

Але марте мый тысе ситуаций шотышто гына лӱдын, ӧрын шинчем ыле. Ынде кок-кум пачаш неле. Чаманаш гына логалеш, вирус Российышкат,  Марий Элыште илыше-влак декат миен шуын. Сандене каласыме шуэш: правительствыште, вуйлатыше-влак мом ышташ йодыт, кузе лияш каласат – колыштса, йодмым шуктыза. Тиде эн ончыч калыкым утарен кодаш ышталтеш. Мӧҥгыштӧ шинчаш темленыт – шинчыза, нигуш ида лек. Тачысе кечын тыге гына тазалыкым арален кодаш ӱшан уло.

Эрта чылажат, но тидлан жап кӱлеш… Таза лийза!