1-4 февральыште Угарман кундемыште 16 ияш марте рвезе-влак коклаште футзал дене Юл кундемысе федеральный округын первенствыже эртен. Марий Элын чапшым тушто «Зелёный ключ» команде арален.
Мини-футбол отделенийын спортсменже-влак турнирыште сайын модыныт. Группо-влак дене таҥасыме йыжыҥыште кок гана сеҥеныт. Тылеч вара четвертьфиналыште, полуфиналыште шке мастарлыкышт да сеҥаш кумылан улмышт дене ойыртемалтыныт. Финалыште Угарман кундемысе «Норман» команде дене модыныт. Модмашын тӱҥ жапшым 1:1 счёт дене мучашленыт, но пенальти серийыште 6:5 счёт дене сеҥеныт. Марий Элын «Зелёный ключ» командыже чемпион лӱмым налын. Эн сай вратарь семын ты команде гыч Максим Сидиковым палемдыме, эн сайын модшо – Никита Попов, эн сай тренер – Сергей Изосимович Порфирьев.
Рвезе-влаклан Российын первенствыштыже тыгаяк сай модмашым ончыкташ тыланена!