13 январьыште Россий печать кече палемдалтеш. Газетым, журналым сӧрастарымаште, содержанийым пойдарымаште фотокорреспондентын надырже изи огыл. Пиалеш, ты пашалан шӱман-влак самырык коклаштат улыт.
Медведево район Шойбулак кыдалаш школышто фотокружокым почмылан тений шыжым 10 ий темеш. Тыште тунемше-влак Илья Мичанин (8-ше класс) ден Лёва Исаков (6-шо класс) каникул годымат кружокым вуйлатышышт, технологий дене туныктышо Н.И.Смирнова дене пырля пӱртӱс лоҥгашке чӱчкыдын лектыт да, телын оҥай сӱретше-влакым ужын, фотографироватлаш тунемыт.
Илья ден Лёва школышто да шочмо кундемыште лийше тӱрлӧ событийлам войзат да школ пырдыжгазетыште фотоувер семын савыктат. Тылеч посна республикысе да Российысе тӱрлӧ фотоконкурслаште шке пашашт дене участвоватлат.
Кодшо ий декабрьыште Калининград олаште эртыше «Шочмо элна мемнан икте» конкурсышто И.Мичанин ден Л.Исаков 1-ше да 2-шо верлам налыныт, диплом дене палемдалтыныт. Кодшо ийын тиде школыштак тунемше Настя Гусева «Верность» фотож дене ончыч Йошкар-Олаште, вара Москошто эртаралтше фотоконкурслаште икымше верым налын. Удырлан «Артекыште» канаш путёвкым пуэныт.
Кӧ пала, нунын кокла гыч ала мемнан землякна тӱнямбалне чапланыше тале фотокорреспондент Виктор Тёмин гай кумдан палыме фотосӱретче лектеш. Чыла лийын кертеш. Но икте раш, тидлан тыршен тунемман да тӱҥалме йӧратыме творческий пашалан шкем тӱрыснек «пӧлеклыман». Ончыко каяш манын эре уым кычалман.
Иван Речкин.
Авторын фотожо.