Чап лийже тыланет, ветеран!

 

Сарын ветеранже-влакын кузе илымышт нерген утларакше 9 Май пайрем лишан да 22 июнь кече годым шарналтена. Йӧра шке ача-кочаштым, ава-коваштым лишыл еҥышт йӧратат да полшаш тыршат.

Кугу Отечественный сарын ветеранже В.Ф.Филиппов 99 ийыш тошкалын. Тудо Йошкар-Олаште Владимир эргыж дене пырля ик пӧлеман пачерыште ила. А ветеранлан пуымо кум пӧлеман пачерыште Александр эргыже ешыж дене вераҥын.

Василий Филиппович Волжский район Корамас кундемыште 1921 ий 25 октябрьыште шочын. Стоматологлан пашам ыштыше Татьяна Димитриевна дене, сар пытымеке, 1945 ийыште ушненыт да 64 ий пырля лийыныт. Кок эргышт шочын. Эрге да уныка-влак кугу ийготан улыт. Светлана уныкажлан тений 37 ий темеш, а Сергейлан – 32 ий. Нуно ешаҥын огытыл.

«Мый марий улам» манмемлан Василий Филиппович куанен кайыш. «Нигӧ дене марла кутыраш. Пелашем руш ыле. Эргым да уныкам-влакат рушла мутланат», – чон вургыжынрак пелештыш фронтовик.

Тазалык да книга

Ветеран шкенжым ончычсо семынак кожмакын куча. «Кузе эмлалтыда?» – йодым туддеч. «Пытартыш жапыште ик шинчам огеш уж, ик йолем весыж деч кӱчыкрак, сандене окшаклен коштам. Эмым ом йӱ, калык медицине дене пайдаланем. Мый вет врач улам, – вашештыш тудо. – 1987 ийыште пенсийыш лектым. Тазалыкем ситышын, шонем, сандене Киевысе традиционный огыл медицине институтышко тунемаш кайышым. Теве кок ий ончыч «Жить до 120 лет… Это возможно» книгам лекте. Калык медицине дене эмлалтме шотышто эше ик книгам возенам. Энциклопедий сынан тыгай материал республикыштына савыкталтын огыл. Шинчам да возем. Тольык савыктен шуктен омыл».

Пашам ыштен тунемше еҥ яра шинчен огеш керт. Василий Филиппович дене пырля фотосӱретше-влакым радамлышна. Нуным онча да кушто улмыжым раш каласа. «Теве Кугыжаныш Погынын председательже Минаков ӱжын ыле. Тыште шочмо вершӧрыштем Чоткар лӱмеш пыштыме кӱ воктене улам. Тиде картычкыште Йошкар-Оласе икымше номеран президент школыш Геннадий Дмитриевич Пряниковын ӱжмыж почеш миенам да йоча-влак дене пырля сниматлалтынам. А тиде 11-ше №-ан гимназийыште йоча-влак дене вашлийме годым», – манеш тудо.

В.Ф.Филиппов чылаже 14 книгам савыктен луктын. Тушто сар нерген почеламут, очерк, повесть, пьесе, ойлымаш-влак, калык медицине дене тӱрлӧ ой-каҥаш-влак улыт.

Неле жап

Армийыш каен

Белоруссийыште

Сар деч вара

Нине теме-влак дене умбакыже материалым «Кугарня» газетын 8 майысе (2020 ий) номерыштыже лудаш темлен.