22 июльышто илыш гыч талантан журналист, палыме мурызо да концерт-влакым вӱдышӧ Раисия Михайловна Данилова илыш дене чеверласыш.
Тудо 1954 ий 28 июльышто Волжский районышто шочын. 1971 ийыште Кугу Корамас кыдалаш школым, 1975 ийыште Йошкар-Оласе И.Палантай лӱмеш музыкальный училищым, 1987 ийыште Н.К.Крупская лӱмеш МГПИ-н филологий факультетшым тунем лектын.
Раисия Михайловна моткоч талантан да кугу авторитетан еҥ ыле. Ӱмыржӧ мучко оптимист лийын да шке пашажым моткоч чот йӧратен.
Тудын илыш гыч вучыдымын кайымыжлан ме чот ойганена. Марий национальный тӱвырам вияҥдаш ӱмыржӧ мучко тыршыше ты еҥ эрелан мемнан, радиом колыштшо-влакын, йолташыже да коллегыже-шамычын чонешышт кодеш.
Тудын лишыл еҥже ден родо-тукымжылан, коллеге ден йолташыже-влаклан чаманымашым каласена. Порын шарнена.
М.З.Васютин, К.А.Иванов, Е.П.Кузьмин, М.И.Матвеев,
А.П.Пуртов, В.А.Кольцов, В.Д.Кульшетов, И.А.Фоминых.
—
22 июльышто эрдене Звенигово – Шелаҥгер – Морко кугорнышто аварий лийын: Лада Калина ден ВАЗ-2112 ваш миен тӱкненыт.
Тушто палыме марий мурызо, уста журналист Раисия Данилован (да тудын пассажиркыжын) ӱмырышт кӱрылтын.
Марий Элын сулло артисткыже Раисия Данилова ӱмыржӧ мучко гаяк Марий радиошто (ВГТРК) тыршен. Пенсийыш лекмеке, Марий Эл Радиошто передаче-влакым ямдылаш тӱҥалын. Шуко мероприятийым, концертым устан вӱден. Тудын кажне шомакше шонаш таратыше, молан-гынат туныктышо лийын.
Раисия Михайловнан ешыжлан да родо-тукымжылан чаманымашым каласена.
«Кугарня» газет редакцийын,
Марий Эл Радион коллективышт.