Бульвар, каныме вер, терминал

Российыште регион-влакым вияҥдыме Правительственный комиссийын Президиумжын  заседанийыштыже Марий Элым вуйлатыше А.Евстифеев республикысе инфраструктурный проект-влак нерген каласкален.

Тудын мутшо почеш, республикна кум кугу проектлан бюджетный кредитым ойырымо шотышто йодмашым колтен, тидыже 1 млрд 345 млн теҥгеш шуэш. Кок проектше илыме верым тӱзатыме дене кылдалтеш. Иктыже Медведево посёлкышто Сеҥымашын 75-ше идалыкше лӱмеш бульварым ышташ йӧным пуа, весыже – Медведево ден ЙошкарОла коклаште Черняков уремыште каныме верым. Тидлан 382,4 млн теҥге ден 319,7 млн теҥге кӱлыт.

«Проект-влаклан эҥертен, 460 тӱжем квадратный метр утла илыме верым чоҥаш лиеш. Проектно-сметный документаций ямде, кугыжаныш экспертизе тудым сайлан шотлен», – ойлен республикым вуйлатыше.

Кумшо йодмаш – ЙошкарОласе аэропортышто пассажир терминалым чоҥымо шотышто. Ты проект почеш паша 2020 ийыште тӱҥалын. Республикым вияҥдыме индивидуальный программе почеш 740 млн теҥге ойыралтын. Проектно-сметный документаций почеш терминалым чоҥаш 1 млрд 476 млн теҥге кӱлеш. Тудым 2022-2024 ийлаште чоҥен пытараш 643 млн теҥге инфраструктурный бюджетный кредитым йодмо.

Правительственный комиссийын еҥже-влак Россий Правительстве председательын алмаштышыже М.Хуснуллин дене пырля Марий Эл Республикысе нине проект-влакым илышыш шыҥдараш кутырен келшеныт.