Узбекистан Республикысе Бухара олаште шочын-кушшо Камилла Икрамова куд ияш улмыж годымак врач лияш шонен. Бухара олаште тудын коваже – палыме йоча кардиоревматолог. Коважым онченак, тудо илышыжым медицине дене чак кылдаш шонен.
Икымше гана Марий Элышке
Камилла МарГУ-со медицине институтышто терапевтлан нылымше ий тунемеш.
Бухара оласе школышто 9 классым пытарымеке, тудо верысе Академий лицейыште биологий да химий направлений почеш тунемын. Медицине дене кылдалтше образованийым шочмо Узбекистаныште огыл, а Российыште налаш шонен. Узбек ӱдыр Марий Элысе вузым ойырен налын.
– Российын тӱрлӧ вузшым онченам. Но тушко тунемаш пураш манын, экзаменым сдатлаш Российышке кайыман. Тиде йӧндымылыкым луктын.
Ты жапыште Ташкент олашке Марий Элысе университет гыч толын коштыныт, экзаменым приниматленыт. Сандене мыят экзаменым кучышым. Йотэлысе студент улмылан кӧра мыланем бюджет вер лийын огыл, садлан Йошкар-Олаште МарГУ-што контракт почеш тунемаш тӱҥальым. Тыге илышыштем икымше гана Российышке каенам. Икымше курс гыч вузышто чолгалыкем ончыктенам, тӱрлӧ олимпиадышке, мероприятийышке ушненам. Портфолиом чумыренам. Чолгалыкем, сайын тунеммем шотыш налын, кокымшо курс гыч мыйым бюджет верышке кусарышт, – мане К.Икрамова.
Хирургий олимпиадышке
Российысе тыгай олимпиадышке Камилла 1-ше курс гычак коштеш. Тидлан чот ямдылалтеш, практике да теорий шӧрыным шинчымашым келгемда.
– Хирургий олимпиадышке шкетын огыл, а тӱшка команде дене кайыман. 1-ше курсышто туныктышо-влак шинчымашем тергеныт, акленыт да ты командышке налыныт. Мо оҥайже: тунам эн изиже ме кок студент гына лийынна, молышт чыланат – кугурак курсышто тунемше ӱдыр-рвезе-влак.
Икымше курсышто декабрьыште Озаҥыште студент-влак коклаште эртыше Россий кӱкшытан хирургий олимпиадыште ик студент дене пырля посна конкурсышто икымше верым налынна. Вес ийынже Самара гыч вер деч посна пӧртылынна. Кумшо курсышто корнынам коронавирус чактарыш. Теве ынде Пермьышке каяш ямдылалтам, – ойла Камилла.
Икымше полышым пуаш туныкта
МарГУ пелен чумыралтше «Волонтёры-медики» российысе толкынышто Камилла Икрамова ынде икмыняр ий чолгалыкшым ончыкта. Кодшо ийын пырля тунемме ӱдыр-рвезе-влак дене пырля iВолга форумышко миен коштын. Тушто нуно еҥ-влаклан икымше полышым пуаш туныктымо школым чумырымо проектышт дене палдареныт. Ты кӱлешан проектым кӱкшын аклыме да 300 тӱжем теҥгеаш грантым ойырымо. 2021 ий гыч МарГУ-што икымше полышым пуымо шотышто школ пашам ышта, занятий-влакым Камилла шкетын эртара. Кодшо ийын ӱдыр кум школышто 52 еҥым туныктен луктын. Тений 7-8 школым эртараш палемдыме.
«Кодшо ийын февральыште мыйым региональный координаторлан шогалтеныт. Мый Республике мучко икымше полышым чыла направлений почеш пуаш туныктымылан да мероприятий-влаклан вуйын шогем. Занятийышке медицинылан шӱмаҥ кажне кумылан еҥ толын кертеш, тидлан оксам тӱлыман огыл. Студент, тунемше, пашам ыштыше еҥ-влак коштыт. Тений Йошкар-Олаште веле огыл, Звенигово, Козьмодемьянск олалашке туныкташ лекташ кутырен келшыме.
Кажне школышко икмыняр еҥ погына. Занятийлашке теорий да практике ужаш-влак пурат. Тылзат пеле тунемман. Тушто мый шӱм-шодо пашам ыштыдыме (реанимаций), йӱлымӧ, ушым йомдарыме, вӱр чот йогымо годым да моло икымше полышым пуаш туныктем. Чыла занятий эртымеке, тунемше-влак экзаменым кучат. Тиддеч вара гына регистарционный номеран сертификатым кучыктена. Серификат дене кум ий пайдаланаш лиеш.
Мыланем ты паша келша. Занятийла деч вара таум ойлат гын, эше чотрак тыршаш кумылем лектеш, – мане К.Икрамова.
Кодшо ий декабрьыште Камилла Москосо Н.И.Пирогов лӱмеш российысе национальный шымлыме медуниверситетыште квалификацийым нӧлтен.
Узбекистан йӱлам акла
Узбекистан кундемжым ӱдыр йӧрата, идалыклан кок гана тушко миен толеш. Шочмо верыште тудым ача-аваже, шӱжарже, родо-тукымжо вучат.
Бухара ола – ик эн тошто ола. Эл хлопокым да шёлкым ыштен лукмо дене чаплана. Шке кид дене ыштыме ковёр тыште кӱкшын аклалтеш.
Ты элыште кеҥежым чот шокшо, телым лум шагал да йӱштӧ. Камила узбек культурыжым, йӱлажым пагала да яра жапше годым тӱшкагудышто узбек кочкышым ямдыла.
– Узбекистаныште еҥ-влак унам сайын вашлийыт. Уремыште ошкылшо кеч-кӧм ӱжын пуртен кертыт. Сӱан да йоча шочмо шотышто посна тошто йӱла аралалтын. Сӱан деч ончыч да йоча шочмеке, эр (утренний) пловым ямдылат.
Узбек сӱанын тошто йӱлаже ӱдырым йӱктымӧ шотышто аралалтын. Ӱдырым эн ончыч ача-ава деч йодыт, вара гына ӱдыр-рвезе келшен кертыт. Сӱаныш 500 еҥ погына. 21 мартыште ме Наврузым, У ийым, пайремлена. Ты кечын сумаляк кочкышым ыштат. Тулышто казанеш шыдаҥ дене вишкыде пучымышым шолтат. Икте-весе деке унала коштыт, тамле кочкыш дене сийлат, – мане К.Икрамова.
Камилла куд ий тунемеке, ординатурышто репродуктологлан тунемаш пураш шона: азам ыштен кертыдме ӱдырамаш-влаклан полшаш кумылжо уло.