«Авам семын туныктышо лийнем!» –

 

манеш Оршанкысе шуко профилян колледжыште тунемше С.Свинцова.

 

Отличницын тӱрлӧ наградыже нерген ойлен пытарашат неле. Теве тений январьыште «Восстание декабристов» тӱнямбал конкурсышто 3-шо верыш лектын. А майыште индивидуальный проект-влак смотр-конкурсышто икымше верым сулен!

«Авамат ты колледжым тунем пытарен, сандене кажне гана шке самырык пагытше нерген каласкалымыж годым «Мыят тушко тунемаш каем» шонымаш чоныштем илен. Тудын семынак тӱҥалтыш класслам туныктышо профессийым налнем. Авам Ольга Николаевна школышто шым ий гына туныктен гынат, ынде когыньнан шонымашнам илышыш мый шыҥдараш тӱҥалам», – манеш Софья.

Софья Оршанке посёлкышто шочын-кушкын. Чолга ӱдыр чыла вере шуктен. Тудо посёлкысо Йоча сымыктыш школын «Фортепиано» пӧлкажым тунем лектын. Школышто тунеммыж годымак «Алиса» куштымаш ансамбльыш коштын. Тыгак «У Мурочки» театр-студийыште тӱрлӧ спектакльыште шукыж годым тӱҥ рольым модын. Теве «Кошкин дом» йомакыште Пырысын образшым келыштарен, «Аленький цветочек»  постановкышто – Настенькам. Талантан йоча-влакым шке йырже А.А.Падерова ушен да шукылан туныктен. Чаманен каласыман, ӱмаште тудо мемнам коден кайыш…

«Кодшо тунемме ийынак «WorldSkills» («Самырык профессионал-влак») чемпионатлан ямдылалташ тӱҥалынна. Ӱмаште «Soft skills» программе дене тунемынна: вебинарым колыштынна, видеоурокым онченна да заданий-влакым шуктенна. А тений студент-шамычым, «WorldSkills Russia» чемпионатыште участвоватлаш манын, посна программе дене туныктат. Чемпионатыш тунемше-влакым кумшо курс гыч веле налыт. Но тиде куштылго огыл таҥасымашлан кӱлынак ямдылалтман. Ты шотышто мыйын наставникем – руш йылмым туныктышо Ольга Николаевна Байгильдина», – каласкала ӱдыр.

УМБАКЫЖЕ — «Кугарня» газетын 17 декабрьысе номерыштыже.Кевыт