Англичан йылмымат палыман

Туныктышын шуктен толмо пашаже кугу пагалымашым сула. Тидым кажне еҥ умылышаш да туныктышын пашажым аклышаш. Туныктышо – шинчымаш дене илышым волгалтарыше, икшывым чын корнышко виктарыше еҥ. Ик тыгай еҥ –Волжский район Карай школышто англичан йылмым 29 ий туныктышо Надежда Александровна Поликарпова.

Историйым туныкташ чон ӱжын

Карай школыштат туныктышо-влак чот тыршат. Йоча-влакын о келге шинчымашышт, тӱрлӧ конкурсышто, олимпиадыште сеҥышыш лекмышт – чыла нунын надырышт. Надежда Александровна – тидын шотышто кугу опытан еҥ. Тынар ийыште шуко икшывым англичан йылмылан шӱмаҥден кертын да келге шинчымаш дене уш-акылым пойдарен толын. Тудо Карай кундемыштак шочын-кушкын, паша корныжат тыштак тӱҥалын.

«Ешыштына ме ныл икшыве кушкынна. Кумытын туныктышо лийынна, тӱрлӧ вере пашам ыштена. Авамат, Раисия Ивановна Колесникова, жапыштыже школышто туныктен. Но ешаҥмеке, тудо ятыр ий ялсоветыште бухгалтерлан пашам ыштен.

Мый эре историк лияш шоненам. Но Крупская лӱмеш Марий пединститутышто историко-английский факультет гына лийын. Тыге историйым да  англичан йылмым туныктышо профессийым налынам.

Карай школышто историйым туныктышо-влак ситеныт, сандене мыланем англичан йылме урокым вӱдаш пуэныт», – ойла Надежда Александровна.

Тӱрлӧ йӧным кучылтеш

Туныктышо 2-шо гыч 11-ше классла марте туныкта. Йылмым сайын палаш манын, заданийым решатлыме, шомак-влакым тунемме гына огыт сите. Йоча-влакым туныкымо годым Надежда Александровна тӱрлӧ йӧным кучылтеш.

«Кызыт англичан йылме пеш кӱлешан. Тунемше-влак тидым сайын умылат да тыршен тунемыт. Аудированийым ыштена, мут-влакым кусарена, предложенийлам чоҥена. Тунемше-влаклан чӱчкыдын англичанла сочиненийым возаш, мом лудмым каласкалаш пуэм. Ме тыгак йот йылме дене мурена, фильм ден мультфильм-влакым ончена. Тыште артистла койын моштыман», – ойла тудо.

 Марий йомакым – англичанла…

Жапыштыже Надежда Александровна йот йылме дене посна кружокым вӱден улмаш, варажым чарнен. Тений гыч адакат 6-8-ше класслаште тунемше ӱдыр-рвезе-влаклан англичан литератур дене кылдалтше кружокым эртара. Лач тыште англичан калыкын сылнымутшо дене палыме лийыт, йот йылме дене спектакльым, кӱчык инсценировкым шындат. Кум ий ончыч Карай школышто тунемше ӱдыр-рвезе-влак «Ший Пӱян Ший Пампалче» марий спектакльым англичанла модыныт.

«Тудым класс деч ӧрдыжысӧ мероприятийыште ончыктымо. Тыгак 2017 ийыште Волжский районышто йот йылмым туныктышо-влаклан эртарыме семинарыште шынденна. Курыкмарий туныктышо-влакын пособий книгашт гыч англичан йылмыш кусарыме «Ший Пӱян Ший Пампалче» текстым налынам. Южо ужашыштыже шке вашталтышым пуртенам. Моткоч оҥай лектын. Марий сем йоҥга, марий куштымаш шындалтеш, но тыгодым герой-влак чылан англичанла мутланат. Тудым 6-шо ден 7-ше класслаште тунемше ӱдыр-рвезе-влак ончыктеныт», – ойла туныктышо.

Тынар ийыште Надежда Александровна шуко чапкагаз дене палемдалтын. 2017 ийыште Россий Федераций образований да науко министерстве тудлан Почётан грамотым кучыктен. Кугу куан: 10 тунемшыже тудын семынак йот йылме туныктышо лийыныт да тӱрлӧ верыште: Тюменьыште, Крымыште, Йӱдвелыште, шочмо Волжский районышто – пашам ыштат.

Тиддеч посна Надежда Поликарпова 2004 ий годсек школышто профсоюз организацийын председательжылан шога. Ты паша денат тудын шагал огыл чапкагазше погынен. Эн кугулан Профсоюзын о Россий кӱкшытан Почётан грамотшым шотла.

 Еш – илыш эҥертыш

Пелашыже дене коктын ик вершӧрыштӧ шочын-кушкыныт, школышто пырля тунемыныт. Евгений Николаевич – профессийже дене инженер-механик. Жапыштыже верысе колхозышто инженерлан пашам ыштен, Йывансола ялысе колхозышто председатель лийын. Пытартыш ийлаште Озаҥысе УФСИН-ште уголовный исполнительный системыште младший инспекторлан тыршен. Кызыт – пенсийыште. Кристина ӱдырышт Владимир оласе юридический институтышто юристлан тунем лектын. Москошто УФСИН системыште юристлан 6 ий тырша. Ксения тений Политехыште управлений да права факультетым тунем лектын.

Надежда Александровна Поликарповам Карай школышто пагалат да аклат, тунемше-влак тудын англичан урокышкыжо куанен вашкат. Тӱҥжӧ: тунемше-влак йылмым сайын палышт да илышыште тудым кучылт моштышт.