Морко район Кораксола ялыште шочшо Анелия Михайлова шке лӱмжӧ нерген тыгерак каласкала:
– Анелия лӱмым мыланем ачам да Валя акам пуэныт. «Анелия моткоч сылнын шокта, садлан, шочмекет, тиде лӱмым пуаш кутырен келшышна», – кушкын шумекем ойлен ыле акам.
Ачам Георгий Михайлович Михайлов Кугу Отечественный сарыште лиймыж годым поляк-влакын мландыштышт ты лӱмым колын улмаш. Ешыште да лишыл еҥ-влак мыйым Аля маныт, но мыланем Анелия утларак келша.
Славян йылмыште Анелия лӱм порылыкым, моторлыкым, ныжылгылыкым ончыкта. Тюрк йылмыште «анелия» – тиде пеледыш, а грек йылмыште ты мутын значенийже – волгалтше, ойыртемалтше.
Анелия Георгиевна – туныктышо, ончыч Шӱргыял школышто туныктен, 2017 ий гыч Морко посёлкысо 1-ше №-ан школышто пашам ышта. Пелашыж дене кум икшывым ончен куштеныт, кок уныкан коча-кова улыт. Айдемын койыш-шоктышыжо, илышыжат тудын лӱмжӧ дене кылдалтыныт манмылан А.Михайлова ӱшана. Вет тудо чыла шотыштат арулыкым, моторлыкым, ныжылгылыкым акла. Тӱрлӧ пеледышым йӧрата.
А.Михайлован альбомжо гыч налме фото.