Шочмо Алжир кундемжым коден, Аля Эддин Гезали Марий Элышке икмыняр ий ончыч шинчымашым налаш толын. Рвезе тидлан лӱмынак руш йылмым келгын тунемын. Таче тудо МарГУ-со медицине факультетыште нылымше курсышто общий практикысе врачлан тунемеш.
Студент, туныктышо-влак коклаште – пагалыме еҥ, сеҥымашыже мучашдыме. Аля Эддин вузын чапшым тӱрлӧ олимпиадыште, шанче мероприятийыште нӧлта. Волонтёр-медик пашам чолган шуктен, IT-технологийыште шкенжым терген ончен да сайт-влакым шкеак ыштен. Тений ик тыгай разработкыжо биохимий дене кылдалтше лийын. А кодшо кечылаште «Идалыкын студентше-2022» Российысе национальный премийын «Идалыкын йот студентше» номинацийыштыже лауреат лӱмым сулен.
Российысе премий
А.Э.Гезали, «Идалыкысе студент-2022» премийын республикысе йыжыҥжым эртымеке, Марий Элын чапшым Россий кӱкшытыш аралаш каен. Мероприятий Москошто 12-16 декабрьыште лийын. Российын 70 регионжо гыч 1000 студент таҥасен.
– Конкурс Москошто «Твой ход» кугу форум годым эртаралтын. Марий Эл гыч финалыш 19 студент миенна. Мый «Идалыкын йотэлысе студентше» номинацийыште шкем тергенам. Икмыняр йыжыҥым эрташ кӱлын. Шке нерген палдарыме презентацийым ончыктенам, тӱрлӧ тестым решатленам, шке элысе тӱвыра дене палымым ыштенам да моло заданийым шуктенам. Мутлан, жюри участникын лидер качествыжым, шонен моштымыжым аклен.
Участник-влак пеш виян лийыныт. Марий Эл гыч шкетын сеҥышыш лектынам да жюрин кӱкшӧ акшым налынам. Тыгай премий студент-влакым моткоч чапландара, шонем, – мане А.Гезели.
Кандаш школым вашталтен
Аля Эддинын лӱмжӧ моткоч ойыртемалтше, тудым южышт эше Аладдин маныт. Тудо шуко шочшан военный ешыште шочын-кушкын. Ешын тӱрлӧ вере илымыжлан кӧра кандаш школым вашталташыже логалын. Аля Эддин тунеммаште ойыртемалтын. Школышто 12 классым тунем пытарымеке, Алжирыште тудо гына экзаменлаште эн шуко баллым поген кертын. Ты кугу сеҥымаш рвезылан шке элысе вузлашке, оксам тӱлыде, тунемаш пураш йӧным пуэн. Но Аладдин Российысе иктаж вузыш врачлан тунемаш каяш ямдылалтын.
– Эн ончыч мый Алжирысе медицине вузышто кок тылзе тунемынам. Тӱням ончен кошташ манын, вара Российыш шинчымашым налаш каяш шоненам. Вет ты элын историйже мыланем келшен. Но ик руш шомакым пален омыл. Тыге, руш йылмым тунемаш манын, Владикавказ олашке кайышым, – мане А.Э.Гезали.
Тудо могай гына вузым ончен лектын огыл! Но икана шинчашкыже Марий Эл пернен. Палыдыме, шкешотан кундемыш экзаменым кучаш тарванен да тушко пурен кертын. Вузышто тунемаш куштылго лийын огыл. Вет медицине дене пырля руш йылме дене шинчымашым нӧлташ кӱлын. 1-ше курсышто тудо чыла экзаменым «визытанлан» кучен да шанче конференцийыш чолган ушнен. Икмыняр ий гыч оксам тӱлыде тунемашлан квотым налын сеҥен.
Эре ончылно
Ты рвезе чыла шотыштат тале. Тудо чылажымат ыштен шукта: тунеммаштат моло деч ончылно, вузысо мер илышыш ушна. Рвезе араб, француз, англичан, руш йылмыла дене сайын мутлана. Икмыняр марий шомакымат пала.
Ик сеҥымаш почеш весе рвезылан ончыко каяш, шонымашке шуаш куатым ешареныт. Шанче пашам чолган шуктен, медицине дене кылдалтше тӱрлӧ олимпиадыште шкем терген да тыгодым сеҥымашыш шуын. Аля Эддин анатомий, биохимий дене олимпиадылашке команде дене, тыгак шкетын ушнен. Волонтёр-медик семынат тыршен. Кодшо ийын тудо «Марий Эл Республикыште идалыкын йот студентше» лӱмым сулен, Ханты-Мансийск олаште эртыше «Российысе эн сай медик» конкурсышто мастарлыкшым ончыктен.
Веб разработко, сайт-влакым тудо 3-шо курсышто илышыш шыҥдараш тӱҥалын. IT-технологий дене келгын пашам ыштен. Эсогыл «Лидер марийского госуниверситета» конкурслан шке пашажым темлен да 1-ше верым налын. Тений тудо биохимий дене икымше тунемме модышын демо-версийжым илышыш пуртен.
Умбакыже 23 декабрьыште лекше номерыште лудса.