Россий Федерацийын сулло актрисыже, уста педагог, Галина Владимировна Ковалева Курчак театрым вияҥдымашке да тӱзатымашке кугу надырым пыштен. Тудо ончаш толшо-влакым шке усталыкше дене 50 ий утла куандара, самырык тукымлан сай наставникыш савырнен.
Геолог лияш шонен
Галина Владимировна Йошкар-Олаште пашазе ешыште шочын-кушкын. Изинек тӱрлӧ шӧрыныштӧ шуаралтын.
– Мый 10-шо №ан школышто шинчымашым погенам. Визымше класс гыч Пионер полатыште Тамара Ивановна Дубогрызован драмкружокыштыжо шуаралтынам. Тыгак телевиденийыште «Школьная планета» передачым вӱденам, оласе тӱрлӧ концертыште конферансье семын выступатленам.
Парашют денат тӧрштылынам, спорт денат кылым кученам. А такше геолог лийнем ыле – школышто географийым тунемынам, тӱрлӧ кӱм, минералым шымлаш моткоч оҥай ыле. Но школым тунем пытарыме жаплан ты профессий деч йӱкшенам, лишне келшыше тунемме вер уке, а ачам ден авам тора кундемыш тунемаш кайымемлан тореш лийыныт, – шарналта Галина Владимировна.
Театр аланыште
Г.Ковалева театральный училищыш тунемаш пураш кумылаҥын. Тидлан Нижний Новогород олаште кыдалаш учебный заведенийым ойырен, но начарракын ямдылалтмыжлан экзаменым удан кучен да мӧҥгыжӧ пӧртылашыже логалын. Йошкар-Олаште ик заводыш электромонтажницылан пашаш пурен. Но ты паша тудлан вашке шерым темен.
– Мый умыленам, чонемлан творческий паша лишылрак. Тамара Ивановна Курчак театрыш каяш темлен. Прослушиваний годым режиссёр мыйым ончалын да «Буратино!» вигак манын. Мый изи капан, каҥга, ныжыл йӱкан лийынам, сандене «Золотой ключик» спектакльыште тӱҥ геройым модаш ӱшанен. Курчак-влак дене пашам ышташ неле ыле гынат, опытан актёр-шамыч полшеныт, да шкемынат тунемаш кумыл лийын. Тыге ик роль почеш весым пуэныт. Шукыж годым нуно эре тӱҥ лийыныт: Алёнушка, Дюймовочка, Снегурочка да молат.
Пашам ыштымем годымак Ленинградысе театр, музык да кинематографий кугыжаныш институтышто заочно тунемынам. Тиде жапыштак ешым погенам, кок икшывем шочын.
Жап эртен, ийготлан келшыше образ-влакым чоҥенам. Кызыт иктаж-кӧ черлана але огеш керт гын, нунын олмеш гына модам, – мане Г.Ковалева.
Кугу опытан актрисе шкенжым режиссёр-постановщик профессийыште терген ончен. Тыге тудо пелашыж дене пырля (тудат актёр лийын) кок спектакльым: «Принцесса на горошине» (1997) да «Сказки Котика Мурлыки» (2012) – шынденыт.
У тукымым кушта
Галина Владимировна педагогике аланыште 16 ий тырша. Тудо Республикысе И.С.Палантай лӱмеш тӱвыра да сымыктыш колледжыште «Актёр театра кукол» специальность дене курсым вӱда, самырык специалист-влакым кушта.
– Тунемше-влак дене республикнан чыла театрже гыч преподаватель-влак пашам ыштат. Ме кум выпускым луктынна, кызыт нылымшым «куштена». Тушто 12 еҥ шинчымашым пога. Тунеммаш ныл ий шуйна. Чолга студент-влакым Курчак театрысе спектакльлашкат модаш ӱжына.
Студент-влак тыршат, нунын дене этюд ден спектакль-влакым шындена. Тоштерыш, книгагудыш, школлаш, самодеятельный коллектив-шамыч дек лектын коштына, – ойла Галина Владимировна.
У сомыл
Г.Ковалева Курчак театрыште художественный вуйлатышылан кум ий тырша.
– Театрыштына мый творческий ужашлан мутым кучем. Мыйын тӱҥ сомылем – спектакль сайын шындалтмашым тергаш, режиссёр, художник, артист-влакым ойыраш. Расписаний чын ышталтмым эскераш.
Кызыт театрыште 21 актёр уло. Кок ставкыште пашам ыштыше актрисе-режиссёр Анжела Тихонова ден художник-режиссёр Татьяна Батракова пашам ыштат.
Кажне ийын вич у спектакльым шындена. Тоштыжым репертуар гыч кораҥдаш логалеш, курчак-влак кодыт гын, нуным тоштерлаш але самодеятельный коллектив-влаклан пӧлеклена, – палдара Г.Ковалева.
Кызыт Курчак театрыште «38 попугаев» у спектакль ямдылалтеш. Премьерже 27 апрельыште лиеш.
Г.Ковалева моткоч поро чонан, илышлан куанен моштышо, молымат тидлан туныкта. Усталык корныжо умбакыжат тыгаяк волгыдо лийже да тӱзланен толжо.