Йошкар-Олаште илыше Аида Пчёлкина шке лӱмжӧ нерген тыге воза:
– Аида лӱмым мыланем авам Валентина Сергеевна Декина пуэн. Тудын тукым акажын, Лютик кокайын (Людмила Митрофановна Краснова, тудлан кызыт 93 ий), ӱдыржӧ Аида лӱман лийын, эше акажынат Аида ӱдыржӧ уло. Авай нунын дене Марий кугыжаныш педагогик институтышто ямдылалтме курсышто тунемме жапыште ик ий илен. Тиде изи ӱдыр авайлан ала-мо дене келшен, сандене кокымшо ӱдыржылан тыгай ойыртемалтше лӱмым возыктен. Аида акамлан ачаже Анатолий Васильевич Краснов итальян композиторын оперже гыч налын пуэн, шонем. Тудо 1966-1974 ийлаште тӱвыра аланыште пашам ыштен, тӱвыра министр лийын (тудынат тукым шӱжаржын Аида ӱдыржӧ уло).
Мыланем шке лӱмем келша, изиэм годым мемнан кундемыште мый шкетын тыгай лӱман лийынам. Палыме лийме годым шукынжо тыгай лӱмлан ӧрыт, южыжо композитор Вердин «Аида» оперыжым шарналтат.
Аида лӱмым француз египтолог Огюст Мариет шонен луктын, маныт, тудак Вердин ик оперысе либреттыжлан сюжет негызым темлен. Европышто Аида лӱм икымше гана лач итальян композитор Джузеппе Вердин ик оперыштыже йоҥгалтын. Тидым шотыш налын, лӱм араб йылме гыч пурен манын шонат, тушто ты мут «уна», «пӧртылшӧ», тыгак «пайда», «пашадар» манмым ончыкта. Аида лӱмын лекмыжым африкан йылмыштат ончыктат: игбо йылмыште «икымше ӱдыр», йоруба йылмыште «кугыжан кучем» манмым ончыкта.
А.Пчёлкинан альбомжо гыч налме фото.