Агнета ончылно!

27-29 ноябрьыште Самара областьысе Тольятти олаште фигурный мунчалтымаш дене «Жигули» таҥасымаш эртаралтын. Марий Эл гыч Агнета Латушкина ончыл верыш лектын.

Кум кече жапыште Российын 18 регионжо гыч 120 участник ий ӱмбак лектын. Шкетын мунчалтымаште икымше разрядан спорт мастер але спорт мастерыш кандидат-влак таҥасеныт.

«Спорт мастерыш кандидат-влак» программе дене Агнета Латушкина 32 еҥ коклаште икымше лийын.

Агнета шке мастарлыкшым 5-8 декабрьыште Москошто «Мегаспорт» ареныште фигурный мунчалтымаш дене Ростелекомын Российысе кубокшын пытартыш V этапыштыже ончыкташ тӱҥалеш.