Россий Президентын указше почеш тений Ача кечым икымше гана палемдыме. Тудым ынде октябрьын пытартыш рушарнянже ий еда пайремлаш тӱҥалына. Тыгодым ача-влакын правашт, пенсийышт да социальный льготышт шотышто ме чыла палена мо? Айста нине йодыш-влакым рашемдена.
АВА КАПИТАЛ
Пӧръеҥ икымше йочан усыновительжылан (усыновлений нерген судын пунчалже 2020 ий 1 январь деч вара лектын гын) але кокымшо йочан усыновительжылан (усыновлений нерген судын пунчалже 2007 ий 1 январь деч вара лектын гын) шкетын гына шотлалтеш гын, тудо ава капиталым налын кертеш. Икшывын аваже кола але ӱдырамашын йочам ончаш праважым поген налыт гын, тыгодымат капиталым ача налеш.
ИНВАЛИД ЙОЧА УЛО ГЫН
18 ияш марте инвалид-йочам але йоча пагытыште I группо инвалидностьым налше икшывым ача онча гын, тудлан кажне тылзын 10000 теҥгем тӱлышаш улыт. Йоча дене шинчыме жап
ачан паша стажышкыже страховатлыдыме семын пура, тыгодым кажне ийжылан 1,8 пенсий коэффициент шотлалтеш.
ЖАП ДЕЧ ОНЧЫЧ – ПЕНСИЙЫШ
Йоча пагыт годсек инвалидлан шотлалтше йочам ачаже 8 ийым темымеш ончен гын, пенсийыш 55 ияш каен кертеш. Тудын паша стажше 20 ий деч шагал лийшаш огыл. Тыгодым икшывын аваже жап деч ончыч пенсийыш каен огеш керт.
ИЖДИВЕНЕЦЛАН – ЕШАРТЫШ ОКСА
Пенсийыш лекше пӧръеҥын ешыштыже пашам ыштен кертдыме (ийготыш шудымо йоча але очно тунемше студент) уло гын, пенсий оксам кугемдат. Ешартыш оксан кугытшо – 2014,83 теҥге. Оксам ешыште ик еҥ гына, ача але ава, налын кертеш.
ШКЕТЫН ОНЧЫШЫЛАН
8 гыч 16 ияш марте йочам ача шкетын онча да тыгодым доходшо изирак гын, тудлан ешартыш оксам пуат. Марий Элысе ешыште ик айдемылан илен лекташ ситыше окса 10184 теҥге лийшаш.
СТАЖЫШ ПУРА
Йочан 1,5 ийым темымешкыже, тудым ончаш отпускым ача оформитлен гын, страховатлыме паша стажше кая. Ик ийлан 1,8 пенсий коэффициентым шотлат.