Анонимный алкоголик-влак содружествыш ушнышо кажне еҥын – шке историйже. Ты гана Иринан эртыме корныжым лудаш темлена. Тудо ынде кум ий наре айык.
«Пундаш марте шуынам»
Шкемым эн кугу алкоголиклан шотлем, вет мый илышын пундашыж марте шуынам: тылеч ончыч чоныштем улшо нимогай поянлык кодын огыл, айдеме огыл, айдемым ушештарыше сӱретыш савырненам, манаш лиеш. Тунам эн кугу шонымашем гына ыле – илыш дене чеверласаш, но ала-молан дыр илыше кодынам.
Такшым ончыч шкем алкоголиклан шотлен омыл. Ачам – да, тудо алкоголик, кочывӱдым йӱэш да йырже чыла сӱмыра, ора. Моло семынак южгунам веле подылам, тыште мо удаже манын ойленам. Тӱҥалтыште тыге лийын, варажым чӱчкыдынрак подылам ыле, эше варарак шукырак да пеҥгыдырак алкогольым йӱаш тӱҥалынам. Умбакыже мыланем йӱаш нимогай пайрем, вес амал кӱлын огытыл. Да ачам семынак йӱаш тӱҥалынам.
Тунамат шкем алкоголиклан шотлен омыл – наливайкылаште йӱын шинчыше-шамыч тыгай улыт, манынам. Жап эртымек, шкежат тыгай наливайкылаш кошташ тӱҥалынам. Алкаш-шамыч пече воктене йӱшӧ кийылтыт – шкем лыпландаренам мый. Икана теплотрассе йымалне помыжалтынам. Кузе да молан тушко логалынам, кызытат ом пале. Но варажым теплотрассыште, кудалтен кодымо оралтылаште жапым эртарымаште нимо удажымат ужын омыл. Туге гынат шкемым алкоголиклан шотлен омыл, вет алкоголик шке укшинчышыштыже почаҥ кия, тудын ниможат уке, чылан кудалтен каеныт, шоненам.
Ипотеке дене налме пачерышкем шукыж годым йӱаш коштынам. Иктат ынже уж манын, тушто тӱкылалтын, йӱын киенам, мыланем нигӧ кӱлын огыл. Пашам ыштен омыл, иктаж вере пашаш пурем гынат, икымше пашадар налмеш веле кучалтам ыле. Кидышкем окса логалынат, чарныде йӱынам. А вара, окса деч посна кодмеке, кӱчен кошташ тунемынам, икте да весе дене маленам, тидлан мыланем кочывӱдым йӱктеныт.
«Тыйым ужмем ок шу. Мыйын авам уке»
Жап эртымек, алкоголь олмеш шулдакан тӱрлӧ суррогатым йӱмашке шуынам. Да шке укшинчышыште почаҥын кийыше еҥыш мыят савырненам: йолем отказатлен, да коштынат кертын омыл. Тетла алкогольым йӱын кертын омыл, но йӱдеат чыташ ок лий ыле. Тунар чот орланенам, колаш гына шоненам. Авам ден пелашемынат мыйым ужмышт шуын огыл, нунат колымем вученыт, ӱдырем чыла тидым ужын кушкын. «Да, колашак кӱлеш» вуйыштем пӧрдын.
Шулдакан арака деч пагарем чот корштен, вӱр йоген. Икана уремыш оксам кӱчаш кайышым да, аптекыш пурен, эмым нальым. Эмым йӱмеке, шинчам йӧршын ужмым чарнен. Ындыже колемак, шоненам. Но уке, шинчам уэш почынам. Тунам телефоным кидышкем нальым, «Алкоголиклан полыш» манын возышым да эмлыме учрежденийыш йыҥгыртышым. Тушко кайыме деч ончыч мӧҥгӧ пурен лектым да, тетла ом йӱ манын, мутым пуышым. «Кеч-мом ыште, тый мемнан илышыштына уке улат», – ойлен авам. А ӱдырем ешарен: «Тыйым ужмем ок шу. Мыйын авам уке». Тыге ойлымыжо шӱргем гыч совымо гай чучын да пуйто шӧрлыктарен.
«Мыланем полшыза!»
Наркологий гыч мыйым иканаште реабилитацийыш колтеныт. Ныл тылзе кийыман ыле. Да пуйто лач тушто гына умыленам: икшывем уло, ипотекым тӱлыман! Вуйыштем – пучымыш. «Алкогольым шке сеҥен ом керт, мыланем полшыза!» шкалан шке ойлаш – тиде чын корныш шогалмаште икымше ошкыл.
Реабилитацийыште эркын дене айнаш тӱҥалынам. Икана эрдене кынелынам, а кава канде-канде. Уремыште коштмем годым нарынче пеледышым ужмемлан куаненам, уэш илаш тӱҥалмем гай чучын. Икмыняр тылзе эртымеке, авамлан тауштымем да чот йӧратем манын каласымем шуын. Да тудо толын, ончыч ӱшанен огыл, ӧрынрак ончен.
Тылеч вара группыш куанен кошташ тӱҥалынам. Ончыч шонем ыле: чыла сай манын, чылан адакат ойлаш тӱҥалыт, йодыштыт. Икана тыгай годым ик ӱдырамаш пиалан да эрыкан улам манын куанен каласкален. «Мыят мотор, пиалан лийнем, шыргыжнем» шоненам шке семынем тунам да тудлан кӧраненамат ыле.
«Мый таза лийнем!»
Эмлалтме деч вара тиде шонымаш Содружествыш конден. Анонимный алкоголик программе почеш 12 ошкыл шотышто паша тунамак тӱҥалын. Ошкыл почеш ошкыл ышталтын. Саде пиалан ӱдырамаш деч нине 12 ошкыл шотышто полшаш йодынам. Дольменлаште (ожнысо шӱгарлаште) лийынна, тушто шонен пыштыме шукталтеш, маныт. «Мый таза лийнем» манын, шке семынем ойленам тушто.
Икмыняр жап гыч пашалан медосмотрыш каяш кӱлеш ыле. УЗИ-ш миенам, врач «Тендан рак» манын ойлен. «Рак? Кузе тыге? Мый вет илаш гына тӱҥалынам!» – вуйыштем пӧрдын. Группыш толын, нигӧлан ом ойло, чытем, шоненам. Такшым кевытыш але иктаж наливайкыш пурен, шер теммеш йӱмем шуын тунам. Но ала-могай вий группышкак конден. Тушто мыланем ойленыт: «Ит лӱд. Мо тыланет кӱлеш? Окса? Ит ойгыро, муына. Врачымат муаш полшена».
«Пиалан да эрыкан улам»
Тылеч вара обследованийлаш кошташ тӱҥальым. Операцийым эртараш кечым палемдышт. Онкодиспансер воктеке сумка дене толын шогальымат, лӱдмем дене ик ошкылымат ыштен кертын омыл. Савырнаш да каяш? Ӱмырем мучко тыге ыштенамыс. Но тунам шеҥгек чакнен омыл. «Илышашем уло гын, чыла сай лиеш» – шоненам. Операций годымат лӱдын омыл.
Кызыт таза улам. Анализ-влакым эртарымеке, врач-влакат ӧрыныт. Ынде йӧршеш у илышым илем. Юмылан ӱшанем. Да тачысе кечын мыят пиалан да эрыкан улам манын пеҥгыдын каласен кертам. А илашыже могай сай улмаш!
Йошкар-Олаште Анонимный алкоголик-влак содружествын ныл группыжо пашам ышта. Районлаштат тыгай группо-влак улыт. Кажне кечын погынат, каныш кече, пайрем деч посна. Содружествыш логалаш ончылгоч возалташ, оксам тӱлаш ок кӱл. Виеш нимом огыт ыштыкте. Условий икте гына – йӱмым шуаш кумыл лийшаш.
Алкоголизм проблеме тенданат илышдам локтылеш гын, содружествыште полшат. Тидлан оксам тӱлыман огыл, полыш анонимно пуалтеш.
Йыҥгырташ телефон:
+7 902 670 91 31.
freepik.com сайт гыч налме фото.