Самырык пагытым пайдалын эртарен моштыман, шке мастарлыкым нӧлтен толман. Ты койыш-шоктыш Марий Элысе «Интеллектуал» культурно-информационный рӱдерыште тыршыше, С.Г.Чавайн лӱмеш книгагудышто пашам ыштыше Анастасия Галиевалан келшен толеш. Анастасиям Марий Эл Республикын Кугыжаныш молодёжный премийжылан темлыме.
Марий Элысе «Интеллектуал» культурно-информационный рӱдерын вуйлатышыже Эльвира Куклина «Кувавайын шондыкшо» проектым шонен луктын. Тудым илышыш пуртымаште самырык Анастасиян тыршымыжым ужын, паша лектышыжым шотыш налын, ты рӱдер А.Галиевалан «Социальный кӱлешан да мер паша» номинацийыште Марий Эл Республикын Кугыжаныш молодёжный премийжым пуаш темлен.
Татарстан кундемын шочшыжо
Анастасия Татарстан Республик Актаныш район Йӱштӧ Памаш ялыште туныктышо ешыште шочын-кушкын. Ачаже – Йӱштӧ Памаш школын директоржо, ОБЖ ден информатикым туныкта, аваже – марий да руш йылмылам. Настя ешыште − эн кугу икшыве. Тудын Виктор шольыжо Озаҥ оласе Строительный техникумым тунемын пытарен, Анетта шӱжарже 8-ше классышке коштеш.
Анастасия школ годсек чолга, виян койыш-шоктышан улмыж дене ойыртемалтын. Тудо сайын тунемын, тӱрлӧ конкурс ден олимпиадылаште участвоватлен, школысо «Эрвий» йоча мер организацийыште председатель лийын. «Изирак класслаште тунемме годым «Созвездие» муро конкурсышто участвоватленам. Районысо этапыште кокымшо верыш лектынам. Но кугурак класслашке вончымеке, мураш кумыл йомо. Утларакшым мер пашалан кумылаҥынам. Марий йылме да литератур дене олимпидылашке чӱчкыдын коштынам. 10-шо классыште тунемме годым Озаҥ олаште ты предметла дене икымше верыш лектынам», − ойла А.Галиева.
Марий Элыше шинчымашым налеш
Озаҥ олаште эртаралтше олимпиадышке Йошкар-Ола гыч МарГУ-со туныктышо-влак толын коштыныт. Вуз, тушто улшо марий пӧлка нерген ойленыт. Тидыже ӱдырым Йошкар-Олашке тунемаш каяш кумылым луктын. Тыге 11-ше класс деч вара тудо МарГУ-со Калыкле тӱвыра да тӱвыра кокласе кыл институтышко марий да финн йылмылам туныктышылан тунемаш пурен. Анастасия волонтёр пашам шукташ тӱҥалын, республикысе, вузысо тӱрлӧ конкурслаште участвоватлен, мер пашам шуктен.
«Тунемаш толмеке, мӧҥгым шонен, ойгырен шинчаш огыл манын, волонтёр пашам шукташ тӱҥальым. Икымше курсышто тунемме годым «Марий мотор ӱдыр» республикысе конкурсышто «Мисс очарований» номинацийыште сеҥенам, кокымшо курсышто «Ӱдырсий» конкурсышто мастарлыкем ончыктенам. Вара республикысе «Молодёжный ассамблей» ушемын председательже ик ий лийынам. Марий Элыште илыше тӱрлӧ калыкын шочшышт ваш келшен илышт манын, пырля погынен, тӱрлӧ калык-влак нерген мероприятийым эртаренна», − ойла А.Галиева.
«Интеллектуал» рӱдерыште
Анастасия школышто тунеммыж годымак «Интеллектуал» культурно-информационный рӱдерын пашашкыже ушнен. Тунам тудо онлайн-йӧн дене пашам ыштен гын, Йошкар-Олашке толмеке, тӱрлӧ сомылым шукташ куштылгырак лийын.
Тыгак ӱдыр – самырык этножурналист школын тунемшыже. Ты рӱдерысе пашалан кӧра Анастасия тӱрлӧ олаште национальность теме дене кылдалтше (Санкт-Петербургышто, Москошто, Самарыште) форумлаште участвоватлен. «Школа национального блогера» да «Кувавайын шондыкшо» проект-влакым илышыш шыҥдараш кугун полша.
«Луымшо классыште тунемме годым Марий самырык тукым слётышто участвоватленам. Лач тушто Эльвира Викторовна дене палыме лийынам. Ӱмаште «Школа этноблогера» проект почеш пашам ыштенна. Кодшо ий сентябрь гыч «Кувавайын шондыкшо» проект илышыш пурталтеш. Марий Элыште илалше-влакын чыла интернат-пӧртлашке лектын коштына. Нунын дене пырля мастер-классым эртарена, мутланена. А кызыт коронавируслан кӧра чыла сомыл онлайн йӧн дене ышталтеш. Тӱҥ площадкыште изирак концертым ончыктена, мутланена, мастер-классым эртарена. Октябрьыште илалше-влакын чыла интернат-пӧртлашт дене иктешлыме мероприятий лийшаш. Проект дене келшышын, ме шоҥгыеҥ-влаклан шуко жапым ойыраш тыршена. Нуно тӱрлӧ кидпашам ыштен моштат. Тыге ме, самырык тукым, нунын деч шукылан тунемына», − ойла Анастасия.
Татарстан кунемыште шочын-кушшо ӱдыр татар йылмым шочмо йылмыж гае сайын пала. Тудо татар композитор Жаудат Гильмановлан татар гыч марий йылмышке почеламут-влакым кусара, нуным варажым мурылан келыштарат. Марий эстрадыште А.Галиеван кусарыме почеламутшо негызеш мурым Ший Алиса мура.
Ӱдыр кажне кечылан куанен, ончыкылык нерген шонкала. Вет Марий Элыште тудо волгыдо йӧратымашым вашлийын. Кужу каныш годым шочмо кундемышкыже ача-аваж деке миен толеш, вий-куатым налеш.