Шукерте огыл Волжский районысо Мӱшыл ер воктене курыкыш куржталмаште абсолютный чемпион лӱмым Йошкар-Олаште шочшо да варажым Медведево районышто илыше Сергей Семёнов (снимкыште) сеҥен налын ыле. А 4 октябрьыште 35 ияш землякна шоссеште 10 меҥгым куржталме дене Российыште икымше гана эртаралтше первенствыште «Masters» категорийыште (ветеран-влак коклаште) абсолютный чемпион лӱмым сулыш. Спортсмен-влаклан тыгай йӧн «Спорт – норма жизни» федеральный проект почеш ышталтын да Москошто эртаралтын. Тиде таҥасымаш – «Моя столица» спорт пайремын ужашыже.
Цибикнур селасе марий рвезе – куштылго атлетике да шашке дене спорт мастерыш кандидат. Тыгай сеҥымашыш шуаш ятыр жап тыршыман, пӱжвӱдым йоктарыман…
Мут – икымше тренержылан
Сергейын школышто ойыртемалтмыж нерген физкультурым туныктышо М.М.Светлов дене мутланышым. Тудо Цибикнур школышто 1978 ий годсек туныкта. Опытан педагог улмо годым тунемше-влаклан куштылгырак лиеш. А спорт дене кылым кучаш шонышо-влаклан – сай награде. Мутым спортсменын икымше тренержылан пуэна:
– Сергей школышто пеш тыматле койышан, шке мутшым кучышо, чыным йӧратыше рвезыла шарналт кодын. Тудын тунеммыж годым Цибикнур школыштына спортшкол лийын. Тушто мыланем ече дене тренерлан пашам ышташ пел ставкым пуэныт ыле. Сергей Семёновын ик классыште тунемме йолташыже-влак пеш виян лийыныт, спортым йӧратеныт. Нуно шке коклаштышт ӱчаш-ӱчаш куржталыштыныт. Поснак Сергей йолташыже Максим Безуглов дене таҥасен: я иктыже, я весыже кок секундлан вараш кодын. Шымше классыште тунеммышт годым ты классын командыже ече дене районышто таҥасен да кумшо верым налын ыле. Командыште нине кок рвезе да кок ӱдыр (Олеся Григорьева ден Светланак Малтакова) лийыныт.
Классыште таҥасаш йӧратыше ӱдыр-рвезе-влак улыт гын, чынжымак, виянрак лияш тыршыше, икте-весыштым эртен каяш вийым мушо йоча-влак лектыт. Сергейлан тидыже лачеш толын. 9-ше классыште тунеммыж годым Семёнов республиканский шыже кроссышто кумшо верым налын. А идалык гыч тыгаяк кроссыште тудын кокымшо вер лийын. Тиде ийынак Чувашийысе Новочебоксарск олаште 400 метрым куржталмаште кумшо верым налын ыле. Тусо Олимпийский резерв школышкат ӱжыныт, но шке республикысе рвезе-влаклан вер шагалрак лиеш манын, тунемаш налын огытыл.
Тиде ийлаштак Сергей Медведево районышто куржталме дене икымше вер марте шуын. Тылеч посна рвезе шашке, шахмат дене модаш йӧратен. Тидлан тудым ачаже Александр Семёнович кумылаҥден. Шашке дене спорт мастерын кандидатше нормативым ятыр гана шуктен.
Техникум, университет, институт
Теве тыгай корным эртен полицийын старший лейтенантше, Россий МВД-н Озаҥысе юридический институтшын туныктышыжо Сергей Александрович Семёнов. Тудо кызыт ынде шкеже полицейский лияш ямдылалтше самырык ӱдыр-влакым спортлан шӱмаҥда.
Школ деч вара Марий радиомеханический техникумышто «Бухгалтер» специальность дене тунемеш. Ты тунемме заведенийыште спортлан кугу тӱткыш ойыралтеш, сандене рвезе куштылго атлетикылан утыр кумылаҥын. Тренерже Константин Петрович Лукьянов лийын. А вара Озаҥысе кӱшыл военный комадный училищыште кок ий срочный службым эрта. Тушеч пӧртылын, полицийыш пашаш пура. 2016 ий годсек Озаҥысе юридический институтышто туныкта.
А 2007-2013 ийлаште Сергей МарГУ-што физический культур факультетыште заочно тунемын. Тӱрлӧ вере сеҥымашыш шуаш ятыр тренироватлалтман, да чытышат кӱлеш. Курыкышто куржталме дене С.Семёнов 2017 ийыште Российын той призёржо лийын, ты идалык тургымышто общий зачётышто Российын гран-прижым сеҥен налын. А вес ийынже тудлан Россий МВД-н образовательный организаций-влак коклаште служебный биатлон дене той медальым кучыктеныт. Марий Элыште стоклеточный да руш манме шашке дене куд гана чемпион лӱмым сулен. 2013 ийыште Красноярск олаште лийше Ялысе теле модмаште шашке дене таҥасымашыште сеҥен. 2016 ийыште Сергей руш шашке дене Марий Элын сборныйыштыжо «Звёзды Поволжья» таҥасымашыште участвоватлен, кокымшо верыш лектын. 2018 ийыште Татарстаныште стоклеточный шашке дене чемпионатын ший призёржо лийын.
Москошто – шӧртньым
11 сентябрьыште С.Семёнов Озаҥыште полумарафонышто 10 меҥгым куржын. Тушто 31 минутат 56 секунд результат дене кокымшо верым сеҥен налын.
А 4 октябрьыште Москосо трассыш лектын, шӧртньым сеҥен налын. Тыште куржталыштмаш куштылгыжак лийын огыл. Сергей Семёновын мутшо почеш, 90 метр кӱкшытан курыкыш кок меҥге наре кужытым кок гана куржын кӱзыман улмаш. Тыгак пандемийлан кӧра тӱшка-влаклан пел шагат жапыште стартым посна пуэныт. Участник-влакым вич тӱшкалан шеледеныт.
«Тиде таҥасымаш лийме нерген июльышто пален налынам, сандене ончылгоч ямдылалтынам, лӱмынак кӱчык дистанций-влакым куржталыштынам. – каласкала спортсмен. – Теве 2 августышто Озаҥыште полумарафон ыле, тыгак ик километрат пеле, кум, вич, лу километран да 1000 метр дистанцийлаште таҥасенам. Татарстан дечат сай полыш лийын: республик спортын ветеранже-влаклан соревнованийыш миен толаш корно роскотым пӧртылтен».
«Мо шотышто нелылык шижалтын?» – йодым Сергей Семёнов деч.
«Посна пуымо стартыште таҥасаш нелырак. Пырля куржшо спортсмен-влакым палем, но стартыш кунам лекмыштым ом пале. Ты але вес еҥ мыйым ончылтен мо – ом умыло. Тыгак эн писе кум еҥым комментатор-влак увертареныт гынат, финишыште кӧ сеҥыме нерген эше пален шуктен омыл. Эн нелыже пытартыш кок меҥге ыле. Тунам кӱшкӧ куржын кӱзышна. Тӱҥалтыште тыгай корным нелылык деч посна эртет, а финишыш лишемме годым тидым йол моткоч чот шижеш, сандене чылалан тыгодым йӧсӧ лийын, шонем».