🎗Йошкар-Ола администрацийыште Кугу Ачамланде сарыште Сеҥымашлан 80 ий темме лӱмеш мероприятий-влакым ямдылыме шотышто оргкомитетын заседанийже лийын.
Тушто тӱҥ мероприятий-влакын планыштым каҥашеныт, шарнымаш верлам тӱзатыме да олаште порядкым ыштыме нерген ойленыт.
Йошкар-Оласе Воинский Чап мемориал комплексыште – локальный сарыште колышо-влакын мемориалышт да радиационный катастрофылаште вуйым пыштыше-влакым шарныме мемориал воктене – архитектурно-художественный подсветкым ышташ палемденыт. Тыгак Рӱдӧ тӱвыра да каныме паркыште у брусчаткым шарат. Марково шӱгарлаште воин-влакын шӱгарыштым шотыш кондаш шонат. Олам 9 майлан сӧрастараш тул инсталляций дене волгалтараш шонат.
Мероприятий-влак Ленин лӱмеш площадьыште, Рӱдӧ паркыште, Никонов лӱмеш площадьыште, Патриарший площадьыште, Чавайн бульварыште, тӱвыра полат-влак воктене, Семёновка селаште, Дубкисе стадионышто, Тарханово паркыште да моло вереат эртаралтыт.
9 майыште салтак пучымышым пукшаш шонат. Йошкар-Олалан 400 ий темме паркыште (Рӱдӧ пляж кумдыкышто) пайрем фейерверкым колташ палемденыт.
📸 П.Васильевын фотожо.
2022 ий.