9 май пайремым кузе вашлийыда? Ветеран-влакым шарныме лӱмеш мом ыштеда?
Эльвира Захарова, Параньга район Яҥгетсола тӱвыра пӧртым вуйлатыше:
– Сарыште кредалше 76 ветеранын лӱмжым серен, 2022 ий 9 майыште ялыштына клуб ваштареш обелискым почна. Май тӱҥалтыште тудын воктене йытырайышна. Ынде пайрем кече эрдене, «Шарнымаш герань» акцийым шуктен, пеледышым вераҥдена. Тидлан пеледалтше гераньым лӱмынак куштен ямдыленна.
Кызыт «Курыкмашлык полкым» окнашке луктына, икмыняржым шогалтенна. Коча-кова-влакын фотографийыштым еҥ-влак кумылын кондат.
Кажне ийын «Звон Победы» автопробегым, митингым да пайремым эртарена. Автопробегыште машина веле огыл, мотоциклан оза-влакат ушнат. Нуно клуб ончыч тӱрлӧ флаг дене тарванат да ялнан ныл уремжыге кудал эртат. Ме участник-влакым «Марш Славянки» сем дене вашлийына да пайремле митингым тӱҥалына. «Ший шымаш» коллектив да йоча-влак пырля изирак концертым ончыктат. Калыклан тиде пеш келша. Клубышто ик лукым Кугу Отечественный сарыште лийше-влакым шарнымылан пӧлекленна. Тушто патриотизм сынан мероприятийым эртараш йӧнан. Йоча-влаклан тысе пу автомат-влак келшат, кидыштышт ну пӧрдыктылыт вет.
Фото-влакым Эльвира Захарова колтен.