26 майыште Кугыыжаныш Погынын Почётан Председательже Юрий Минаков 80 ияш лӱмгечыжым палемден.
Юбилярын эртыме корныжо кугыжныш пашаеҥын тыглай карьерже огыл, а Марий кундемым тӱзатымаште шкешотан летопись. Тудо 1968 ийыште Марий Элыш Краснодарысе политехнический институтым пытарен толын.
Юрий Александровичын паша корныжо «Марпромстрой» трестын строительный объектлаштыже тӱҥалын. Республикна тудым практик, аналитик да учёный семынат почаш полшен. 1970 ийыште шке шинчымашыжым студент-влаклан туныкташ тӱҥалын, науко дене кылдалтын да 2000 ийыште докторлык диссертацийым арален. Тудын шанче поянлыкше – тыглай теорий огыл, а ойыртемалтше климатан верыште чоҥымо пашан йӧнжым, технологийжым вашталтыше. Тудо технический науко доктор, профессор, 3200 утла научный пашан авторжо, тышеч 5 фундаментальный монографий улыт.
Юрий Минаковын верысе закондательствым вияҥдымаштат надырже кугу. Йошкар-Оласе горисполком председатель деч тӱҥалын Верховный Советым вуйлатыше марте шуын да эн неле 1991-1994 ийлаште мудречлыкым ончыктен, регионым тӱзаташ ятыр сомылым ыштен. Юрий Александрович – 15 созывын депутатше, тудын депутат стажше 45 ийым эрта.
