9 июньышто РФ Президентын Юл кундемы федеральный округышто полномочный представительже алмаштышыже Олег Машковцев видеоконференций йӧн дене совещанийым эртарен. Тушто 2020 ийын кокымшо пелийыштыже кундемлаште общественный проект-влак почеш пашам шуктымо нерген каҥашыме.
Совещанийыште кугыжаныш властьын регионласе органже-влакым вуйлатыше-шамыч (лач нуно нине общественный проектлам шуктымылан мутым кучат) да тӱҥ федеральный инспектор-влак участвоватленыт.
Коронавирус инфекций шарлымылан кӧра икмыняр проектын форматшым вашталташ логалын, санитарно-эпидемиологический йодмаш дене келшышын, онлайн-режимыш кусарыме.
Олег Машковцев участник-влаклан общественный проект-влакын тӱҥ корныжо-влакым да ыштышаш срокым палемден. Теве «iВолга» окружной молодёжный форумым дистанционный формат дене 24-28 августышто эртарыман. Ты форумышто ныл тематический смене лиеш: «Наша Победа», «Мой бизнес», «Территория для жизни» да научно-производственный. Участник-влаклан образовательный, проектный, тӱвыра ден каныме площадке-влакым темлыман. Ты мероприятийыште 2000 резидент ден 8000 марте ончышо еҥ участвоватлен кертеш.
Тыгак студент-влаклан окружной интеллектуальный олимпиаде, йоча да самырык-влакын коллективыштлан «Театральное Приволжье», «Вернуть детство», йочапӧрт-влаклан полшымо да ача-ава деч посна кодшо йоча-влакын социальный адаптацийышт шотышто конкурс-влакым дистанционно эртараш кутырен келшыме.
Тылеч посна О.Машковцев округышто у общественный проект – стрит-арт фестиваль – лиеш манын. Тушто участник-влак коронавирус инфекций ваштареш кучедалме теме дене кылдалтше граффитим ыштен кертыт. Округысо кундемлаште сеҥыше-влак художественный шонымашыштым шке вершӧрысӧ полат ден пӧрт зданийлаште шыҥдарен кертыт.
Совещаний мучаште регионын представительже-влак 24 июньышто лийшаш Сеҥымаш парад кечын мероприятий-влакым тыгодым эпидемий обстановкым шотыш налын эртарыме шотышто каласкаленыт.