Марий Элым Вуйлатыше Юрий Зайцев аэропортыш миен коштын.
Аэродромым план почеш олмыктат: тачылан 103 тӱжем гыч 72 тӱжем кв метр бетоным пыштеныт. Тыге Йошкар-Оласе аэропортын чоҥештен кӱзымӧ да волен шичме полоса 70 процентлан ямде. Тыгодымак объектым пеҥгыдыракым ышташ деформаций верым пӱчкедат.
Чоҥымо паша кайыме нерген Марий Эл Вуйлатышылан кажне кечын каласкалат.
– Ме Российысе Транспорт министрын кӱштымашыжым ответственно шуктена. Таче шке шинчам денак ужым: чоҥымо паша график почеш кая да чыла паша жапыштыже, эсогыл ончычат шукталтеш. Йӱштӧ толмеке, тургымым кузе мучашлымым угыч толын ончалам. Тунам палемдена: могай пашам вес идалыклан, шошо тӱҥалтышлан, кодена. Кызытеш чумыр сомыл почеш ойлаш лиеш: 2027 ийыште аэропортнан пашажым тестовый режимыш кусарена, – ойлен Юрий Зайцев.
Пашаеҥ-влак тыгак аварийно-утарыше станциян командно-диспетчерский пунктым нӧлтат. Кызыт тушто гидроизоляций ден пырдыжым армироватлыме сомылым шуктат. Тыгак метеоборудований ден светосигнальный техникылан фундаментым ышташ ямдылалтыт. Диспетчерский пунктышто юж толкыным виктарыше, метеорологийлан вуйын шогышо службо да инструктаж кабинет-влак верланат.
Аварийно-утарыше станцийыште ныл пожарный автомобиль лиеш. Объектыште кызыт 137 еҥ ден 54 технике тыршат, тидыже план деч шукырак.
Чыла пашам пытарымек, аэропорт кугурак юж судным приниматлен кертеш, тыге пассажир-влак шукемыт, маршрут ешаралтеш.
Бетон пашам октябрьыште мучашлышаш, а 2027 ий мучаште объектым тӱрыс сдатлышаш улыт. Ты проект Марий Элым социально-вияҥдыме программе, Федераций Советын пунчалже да «Эффективная транспортная система» нацпроект почеш шукталтеш.