690 тӱрлӧ шыл продукцийым ыштат

6 декабрьыште Марий Элым Вуйлатыше Ю.Зайцев «Йола» агрохолдингыште лийын. Тудо шылым перерабатыватлыме, кылмыктыме цех-влакым ончен, вуйлатыше да пашаеҥ-влак дене вашлийын.

Агрохолдингым вуйлатыше Магомед Цинпаев предприятийын ыштен лукмо сатужым ончыктен, паша процесс нерген каласкален, у технологийлан эҥертыме нерген ойлен. Агрохолдингын сӧснам ончышо вич комплексше уло. Тушто ик ийыште 180 тӱжем наре сӧснам ончат, 20 наре тӱжем тонн шылым ыштат. «Йола» 690 тӱрлӧ шыл продукцийым ямдыла.

Ю.Зайцев агрохолдингын пашажым кӱкшын аклен. Кундемыштына ялозанлык сомылым вияҥдаш манын, кугыжаныш могырым чыла шотыштат йӧным ышташ сӧрен.