31 августышто Марий кундем «Газ эстафете» проектыш ушнен.
Ты кечын Курыкмарий район Пайскырык ял шотан илемлан ыштыме распределительный газпучым пашаш колтымо. Тудо Исуткан, Лапсола, Усола, Пӹнгельмычаш, Порандай яллашке газым пурташ йӧным ышта. Лишыл жапыште газ 53 суртыш мия, пуч 3,4 километрыш шуйнен.
Исуткан ялыште канде тулым колтымо пайремыште Марий Элым вуйлатыше А.Евстифеев ден «Газпром межрегионгаз» ООО-н гендиректоржын алмаштышыже Д.Волков лийыныт. Нуно ончыкылык паша нерген каҥашеныт.
Марий Элыште 2021-2025 ийлаште «Газпром» 17 кугу объектым чоҥышаш, 260 км газпучым шупшшаш. Инвестиций 4 млрд теҥгешке шушаш.
Элыштына газым яра пуртымо шотышто программе вич ий пашам ыштышаш. Туддене келшышын, ты предприятий республикысе 60 населённый пунктыш газым пуртышаш. Тылеч посна поселковый газпуч воктене улшо да ончыч пуртыдымо суртлаштат газ дене пайдаланаш йӧным ыштат. Тиде догазификацийыш ушнаш республикыште 2000 наре йодмаш пурен, тышеч 120 утлаже – Курыкмарий районышто илыше-влак деч.