Морко район Шлань ял гыч Эдуард Оразаев шке тукымжым школышто тунеммыж годымак шымлен. Тидлан ялыште илыше шоҥгыеҥ, родо-тукым, ача-аваж деч йодыштын. Бедени кугыза ялысе шуко ешын тукымышт нерген пален, садлан самырык-шамычлан нунын нерген кумылын каласкален. Шке тукымжо нерген Эдуард тыгерак каласкалыш:
– Шлань ялысе XX курым тӱҥалтышын историйжылан эҥерташ гын, Оразайын Баса уныкаже Шора эҥерыште вӱд вакшым кучен. Варажым тушеч ялыш электротулым шупшыныт. Тудын Татарстан кундемысе Шурабаш ял могырыш кайымаште кол пӱяже лийын. Тушто ятыр тӱрлӧ колым ашнен. Садлан калыкыште ты вӱдым Басан пӱя маныныт. Оразай тукым моло ял калык семынак мланде пашам ыштен илен, мӱкшым ончен.
Басан Якын уныкаже – мыйын кугезе кочам. Тудо корно мастар лийын. Пошкудо Унчо ялыш пурымаште Якын кочамын шынден кодымо кок писте пушеҥгыже кызытат шога. Шоҥгыеҥ-влакын ойлымышт почеш, ялыште кочамын эн первый велосипедше лийын. Тудын эргыже, Арсеҥге мыйын кочам, вакшыште тыршен. Эн ончыч Шора эҥерысе вӱд вакшыште, вара – ялыште. Кочамын уста плотник лиймыжымат пеҥгыдемдат. Тудо калыклан пӧртым чоҥаш полшен, окнасергам моторын пӱчкеден моштен. Южо пӧртын окнаштыже тачат нуным ужаш лиеш. Мастар плотникым пошкудо Татарстан кундемышкат чоҥымо пашашке чӱчкыдын ӱжыктеныт.
Ачам, Геннадий, Йошкар-Олаште илымыж годым ЗИЛ машина дене тора кундемлашке кудалыштын, ола уремыште трактор дене пашам ыштен. 1990-ше ийлаште ялыш илаш куснымекыже, верысе озанлыкыште трактористлан, электриклан тыршен. Тудо ачаж гаяк уста плотник, тыгак мастар водитель-механик. Кызыт сулен налме канышыште гынат, ятыр мӱкшым онча.
Оразай тукым гыч лекше-шамыч утларакшым Шлань ялыштак лакемыныт. Тыгак Йошкар-Олаште, Озаҥыште, Саратовышто, республикысе икмыняр районышто шарленыт.