М.Шкетан лӱмеш Марий драмтеатрым вуйлатыше Эрик Алексеевич ЮЗЫКАЙНЫМ чапле лӱмгечыж дене саламлена.
50 ий – тиде айдемын илышыштыже шкешотан йыжыҥ. Тудо эртен кодшым шымлен да иктешлен ончалаш, шке пашалан акым пуэн, ончыкылыклан мо ышташ кӱлмым рашемдаш тарата.
Те Марий тӱняште сайын палыме да кугун пагалыме Юзыкайнмыт тукымын эргыже улыда. Ача-авадан, кугезыда-влакын пашаштым умбакыже ӱшанлын шуеда. Таче кечылан республикыштына эн ончыч шочшо да ик эн кугу, поян традициян М.Шкетан лӱмеш Марий национальный драме театрым вуйлатеда. Тиде, эн ончычак, кугу ӱшан, тыгодымак моткоч кугу ответственность. Ты кугу корабль теҥызыште утыжым лӱҥгалтде ийже, тушто пашам ыштыше-влаклан ласка, эн тӱҥжӧ – калыкын канаш, ушакылым, шӱм-чоным пойдараш куанен коштмо верже лийже манын, шкалан шуко тыршаш да коллективым тидланак кумылаҥдаш кӱлеш.
Ме тиде пашаштыда кугу сеҥымашым тыланена. Воктеныда эреак полшаш кумылан еҥ-влак лийышт, нуно оҥай шонымашышт дене у пашалан кумылаҥден да ылыжтен шогышт. Таза, пиалан, поян лийза!
М.Шкетан лӱмеш Марий драмтеатрын коллективше.