Иктеш ушышо сем: #МУЗЫКАВМЕСТЕ проект «Как молоды мы были» легендарный муро дене умбакыже шуйна
#МУЗЫКАВМЕСТЕ проект «Кугу Элын мурыжо-влак. Юл кундем гыч йӧратен» кугу серийыште у клипым ончыкта. Юл Кундемын эн сылне да чон луклаж дене музыкальный путешествий умбакыже шуйна, ты гана ончышо-влакым «Как молоды мы были» легендарный мурын йоҥгалтмыже вуча.
У клипын премьерыже таче, 9 ноябрьыште, тале композитор, легендарный мурын авторжо Александра Николаевна Пахмутован шочмо кечынже, эрта.
«Как молоды мы были» – «Кугу Элын мурыжо-влак. Юл кундем гыч йӧратен» проектыште кумшо видеоклип. Чылаже 7 видеороликым лукташ палемдыме, кокытшо уже савыкталтыныт: «Течёт река Волга» да «Гляжу в озёра синие». У клипым войзымаште Юл кундем федеральный округын 14 регионыштыжо илыше-влак – палыме артист-влакат, тӱҥалше-шамычат – участвоватленыт.
Нунын коклаште мемнан землякна — Юрий Зорин:
– Тыгай кугу проектыште Марий Эл Республикым ончыкташ мыланем кугу чап. Ончычшо ты проектыш ӱжмылан ӱшанен омыл, мошенник-шамыч возеныт, шоненам. Вара интернетыште вес регионын проектшым ужым да умылышым: мый денем чынжымак #МУЗЫКАВМЕСТЕ проектын организаторжо-влак кылым кученыт. Тимур Ведерников дене пырля пашам ыштыме эн сай кумылым коден. Ончычшо студийыште возенна, а клипым Театр кӱварыште войзенна. Тудо жапыште шуко калык погынен да тидыже ешартыш стимулым, кумылым пуэн. Тыгай кугу проектыш ушнаш йӧнлан организатор-влаклан тау.
Видеоролик-влак #МУЗЫКАВМЕСТЕ проектын лаштыклаштыже, тидын шотыштак ВКонтакте официальный тӱшкаште да полномочный представительын сайтыштыже pfo.gov.ru/ ужаш лиеш, тыгак трансляций регионысо телевизионный каналлаште эрта.
Тиде кугу проект Тӱвыра инициативын президент фондын, ПФО-што Россий Федераций президентын полномочный представительын аппаратшын да «ДНК России» проектын полшымышт дене илышыш шыҥдаралтын.