29 сентябрь гыч 1 октябрь марте Минскыште «ИННОПРОМ» тӱнямбал промышленный выставке эртаралтын.
Тушко республикнан делегацийже миен коштын. Делегацийым Марий Элым Вуйлатыше Юрий Зайцев вуйлатен. Тудын мутшо почеш, Беларусь – Марий Элын ик эн тӱҥ торгово-экономический партнёржо. Кодшо ийын внешнеторговый оборотым 25 утла процентлан кугемдыме. А сатун экспортшо 32 процентлан кушкын. Кундемнан промышленный потенциалже кугу.
Выставкысе ик эн кугу мероприятий – «У технологийын ушемже: ончыкылык промышленностьым шочыктен» пленарный сессий.
Марий Элысе делегаций производитель-влак дене кылым кучымо шот дене икмыняр компанийыште лийын, выставкыште вӱдышӧ предприятий-влакын стендлаштышт техникым, оборудованийым, системым да компонентше-влакым налме шотышто каҥашен.
Тыштак Юл кундем кугыжаныш технологический университет ден Белоруссийысе информатике да радиоэлектронике кугыжаныш университет (БГУИР) коклаште ойпидышым подписатлыме. Тидыже республикыштына радиоэлектронный промышленность кластерым ышташ полшышаш. Ты вуз дене пырля у компетенцийым ешараш, научно-образовательный потенциалым кугемдаш палемдыме.
ПГТУ ден БГУИР радиотехнический да информатике ден вычислительный технике факультетласе паша дене тӱнямбал вашкылым ышташ каҥашеныт: конференцийым, симпозиумым пырля эртараш, научный журналлаште икте-весын опытыштым савыкташ, студент-влакым вашталтен туныкташ кутырен келшеныт.
Юрий Зайцев Союзный эл-влакын ик эн вӱдышӧ машиностроительный компанийыштыже – «АМКОДОР» ОАО-што – лийын. Беларусьын ЖКХ министрже Геннадий Трубило дене тусо сатум ончен савырненыт.
Холдингын предприятийже-влак корным ыштымаште да чоҥымаште, логистический, коммунальный сферылаште, торфым лукмаште, чодыра да ялозанлык пашалаште кучылталтше техникым – чылаже 297 модель ден модификацийым – ыштен луктыт. Ты шотышто Марий Элысе икмыняр предприятий ончыкылык паша шотышто мутланен. Мутлан, металлым обрабатыватлыше «Инструмент-Н» фирме коопераций условий дене механический обработкым темлен. «Метма» порошковый металлургийын методшо-влакым ямдылаш да «АМКОДОР» компанийлан деталь-влакым колташ палемден.
Марий Элым Вуйлатышын пресс-службыжын фотожо.