Игече йӱкшемден, сандене тыныслыкым аралыше-влаклан шокшырак вургем кӱлеш. Тиде амаллан кӧра республикысе тунемме рӱдер-влак вургемым ургымо акцийыш ушненыт.
Ты сомылым Йошкар-Оласе сервис технологий, технологический, строительно-промышленный да Волжск оласе индустриально-технологический техникум-влакын тунемшышт кыртмен ыштеныт. Йошкар-Оласе сервис технологий техникум директорын алмаштышыже Светлана Ивановна Лопкина дене тидын шотышто мутланенна.
Кӱчык жапыште
Ты акцийыш техникум кокымшо гана ушна. Кажне гаяк сай лектыш дене куандара, молан манаш гын тунемше-влак салтак-шамычлан кондымо пайдам шижыт, уло вийыштым пыштен ургат.
– Марий Элысе Образований да науко министерстве деч вургемым ургаш йодмаш толын. Сандене декабрьысе лийшаш тунемме практикым октябрьыш кусаренна да ныл группым ончылгоч тунемме гыч кораҥденна. Тыге вургемым ургымо дене кылдалтше специальностьым налше-влаклан ты кугу пашам ӱшаненна. Толстовкым ургаш манын, «Полупроводниковый прибор-влак завод» флис материалым налын, тыгак йымал вургемлан 6 рулон бязьым пуэн. Материалым ныл техникум коклаште шеледеныт.
Пашам иканаште тӱҥалынна. Ондак ӱдыр-шамычлан нелын чучын, но кӧлан ургымыштым нуно сайын паленыт, сандене, нойымым шижде, кок арня жапыште кажне кечын куд шагат дене ургеныт. Чылаже 50 наре студент тыршен, – палдара Светлана Ивановна да ешара:
– Южо тунемше-влак ургымо вургемыш серышым возен пышташ кумылаҥыныт. Пӧръеҥ-шамычлан эн поро, эн кӱлешан шомакым сереныт. Мыйын шонымаште, тиде салтак-шамычын поснак кумылыштым нӧлта.
Тылеч посна Йошкар-Оласе сервис технологий техникум Курск направленийыште шогышо 56-шо десантно-штурмовой полклан полышым пуэн. Шке гыч оксам поген, куэмым налыныт да 100 йымал вургемым урген колтеныт.
Акцийым эртарат
Калык-влакын икоян улмо кече вашеш техникумын «Милосердие» волонтёр ушемже гуманитарный полышым погымо акцийым увертарен. Тудо 15 ноябрь марте шуйна.
– Ты гуманитарный полышым ме Белгород направленийыште улшо мотострелковый подразделенийлан колташ ямдылалтына. Студент-влак чолган ушнат, гигиене средствам, солыкым, носким, шампуньым кондат.
Тыгак ноябрь тӱҥалтыште ты волонтёр ушемын еҥже-влак Марий Элысе мер-политик рӱдерыш окопысо сортам ышташ да маскироватлалтме сеткым пидаш тунемаш мастер-классыш кайышаш, – мане Светлана Ивановна.
Тыныслыкым аралыше салтакна-шамычлан студент-влак кыртмен полшат. Айста чыланат кертмына семын гуманитарный полышым погена але оксам колтена.
Йошкар-Оласе сервис технологий техникум 83 толстовкым да 144 йымал вургемым урген, Йошкар-Оласе технологий техникум – 74 толстовкым, Строительно-промышленный техникум – 151 йымал вургемым, Волжск оласе индустриально-технологический техникум – 160 йымал вургемым.