X Марий калык погын вашеш
Кодшо арняште Медведево районысо ял администрацийлаште марий калык погыныш делегатым сайленыт, а 20 февральыште иктешлыше конференций Медведево поселкышто лийын. Вигак мо ӧрыктарышыже — 2019 данный почеш, районышто 34 тӱжем утла марий ила манын палемдышт конференцийыште, а погынымашке 20 наре еҥ толын. Тушеч коктын район администраций пашаеҥ лийыныт: иктыже — руш, весыже — татар. Нунын (район вуйлатыше-влакын) ойлымышт гыч чыла шотыштат полшаш мелын улмышт палдырныш. Шке илышнам саемдаш шонена гын, калыклан гына чулымрак лийман.
— Погынымаште эртышым иктешлыме дене гына ышна серлаге, ончыкылан планым палемдышна. Икте утларак рашеме: еҥ-влак погынымашке толаш огыт вашке гын, мемнан задаче – нунын дек лекташ, пырля пашам ышташ, — каласыш Медведево район деч Мер Каҥашын еҥже, Руш Кукмарий школын вуйлатышыже А.Иванов.
Конференцийыш погынышо-влак ончыкыжым районышто самырык-влакын фестивальыштым эртараш, район газетыште марла лаштыкым савыкташ тӱҥалаш кӱлеш манын палемдышт. Медведево поселкышто кызыт шуко марий еш ила, кум школ гыч кеч иктыштыже марий йылмым шочмо йылме семын туныкташ тӱҥалыт гын, сай ыле. Кызытеш Кома школышто гына йоча-влак тыге тунемыт.
Э.ИМАНАЕВ.
