«Кугарня» газет редакцийыште Марий Элын Санкт-Петербургышто полномочный представительже Елена Таникова дене вашлийын мутланаш йӧн лие.
Икте-весе дене палыме лийме деч посна кызыт ышталтше да ончыкылан палемдыме паша нерген мутланышна.
Ленинград областьысе марий-влакын «Ший корно» автономийыштым ыштымылан тений 10 ий темеш. Тидын вашеш июнь тылзыште пайрем вашлиймаш тушто лийшаш, посна программе ямдылалтеш. А шыжым вес проект почеш Санкт-Петербургыш Марий Эл гыч кӱслезе ансамбльым выступатлаш ӱжаш палемденыт. Ты пашашке «Кугарня» газет редакцият ушна, земляк-влак дене пырля вашлияш йӧн лиеш манын ӱшанена.
Елена Сергеевнан мутшо почеш, пашам ышташ шонымаш уло марий йылмым туныктымо шотыштат, чапланыше марий художник-влак дене кылым ыштен, кугу олаште нунын сӱретыштым калыклан утларак палдараш да молат.
Вашлиймаште тыгак Марий калык конгресс дене могай пашам пырля ышташ лиймым каҥашыме.
Елена Таникова икмыняр кечылан Йошкар-Олашке толын. 23 январьыште тудо Марий Эл правительствыште вашлиймаште лийын, республик да Санкт-Петербург кӱкшытыштӧ ыштышаш паша шотышто каҥашеныт.