Тунемше-влаклан эртаралтше Российысе олимпиадын регионысо йыжыҥышкыже биологий да экологий предметла дене Морко районысо Кокласола лицейын 10-шо классыштыже тунемше Анастасия Николаева ушнаш шона.
Ӱдыр изинек чолга, чулым койышан кушкын. 1–7-ше класс марте ты кундемысе Эҥерсола школышто шинчымашым поген. Тушто тӱҥалтыш класслам туныктышо Надежда Васильевна Анисимова Анастасиям сылнымутлан шӱмаҥден. Тыге ӱдыр районысо да республикысе тӱрлӧ лудмаш конкурслаште мастарлыкшым терген. Ик гана веле огыл сеҥыше радамыште лийын. Тыгак ӱстембал теннис дене изи годсек модеш. Спортын ты видыштыже тӱрлӧ таҥасымашыште ятыр гана сеҥен.
Кокласола лицейысе биологий да химий профилян классыш Эҥерсола школ деч вара куснен. Тидын нерген тудо тыгерак каласкалыш:
– Мыланем биологий ден химий предмет-влак куштылгын пуалтыт. Садланак лицейыш тунемаш толаш кумылаҥынам. Тыште моткоч келша. 9-ше классым йошкар аттестат дене тунем пытаренам. Кызыт олимпиадылан кыртмен ямдылалтам. Тылеч ончыч районысо олимпиадыште сеҥышыш лектынам. Ончылнем – регионысо этап, садлан изиш тургыжланыме кумыл шижалтеш. Ты йыжыҥыште шкем сайын ончыкташ манын, шуко книгам лудынам. Тылеч посна факультативыште биологий дене Валентина Михайловна Васильева, экологий дене Светлана Юрьевна Егорова дене шинчымашем нӧлтенам.
Анастасия урок деч вара факультативыште 6 шагат гыч 8 шагат кас марте заниматла. Тылеч посна Марий кугыжаныш университетын эртарыме тӱрлӧ занятийышкыже Йошкар-Олашке лӱмын кудалыштеш. Экологий предмет дене олимпиадылан «Ердӱр ер» нерген проект пашам возен. Тушто тудо ерыште кушшо кушкыл-влакым шымлен. Икмыняр кушкылжо Йошкар книгаш пурталтын. Проект пашам эше мучаш марте шуктыман манын палдарыш. Тыгак ты сомылым виктарымаште тудлан тунктышыжо Светлан Юрьевна чот полшен манын палемдыш.
Ӱдыр яра жапым пайдалын эртара. Яндар южышто коштеш, теннис дене модае, книгам лудеш. Кызыт тудын ик кугу шонымашыже – олимпиадыште сай результатым ончыкташ.
Очко
Ушештарена, биологий дене олимпиадын регионысо йыжыҥже 31 январьыште да 2 февральыште эрта, экологий дене – 15 да 16 февральыште.