– Провой кундем Эсмекпляк ял гыч улам. Туныктышылан тунем лектынам, но ӱпым тӱредме верыште пашам ыштем. Яра жапем уло, садлан чонем кидпашам ышташ ӱжеш. Кидпашам изи годсек йӧратем, а пытартыш вич ийыште тидын денак гына илем. Бисер дене брошкым тӱрлем. Шуко мӱйшудым, вӱдшырчыкым, пеледышым, янлык ден вольыкым, шудым, кайыкым, емыж-саскам да молымат тӱрленам.Тиде жапыште икмыняр шӱдӧ наре пашам ыштенам. Кызыт марий тӱран брошкылан шукырак тӱткышым ойырем. Тыгак шке кидем дене ургымо да тӱрлымӧ бантик дене сумка «шочыч». Тиде пашам умбакыжат шуйынем, эше вестӱрлӧ настам урген, бисер дене тӱрлынем. Тиде паша мылам моткоч келша: чон куана, шӱмем тӧрлана, илыме, еҥлан куаным кондымо шуэш.
Ирина Чепикова.
Пагалыме лудшына-влак. Те могай кидпашам ышташ йӧратеда? Фотом ыштыза да редакцийышкына колтыза. Шкендан нергенат изишак палдарыза. Эн оҥай кум пашан да текстын авторыштлан пӧлек лиеш.