26 ноябрьыште Морко район Кокласола лицейыште Шочмо элна верч Украин мландыште вуйым пыштыше салтак, ты школын выпускникше, Курыкйымал ялын шочшыжо Геннадий Васильевым шарныме лӱмеш волейбол дене районысо турнир эртен. Тушто икымше верым Кокласола лицейын командыже налын, а турнир годым эн сайын модшо-влак коклаште Александр Кушаков ойыртемалтын.
Саша Кокласола лицейын физике да математике классыштыже тунемеш. Спорт нерген шке шонымашыжым тыгерак радамлыш:
– Кажне еҥ спортын тӱрлӧ видыштыже шуаралтын кертеш. Кӧ куржталеш, кӧ баскетбол дене модеш, кӧ ече дене коштеш. Икманаш, спорт кеч-кӧланат пайдам пуа, тазалыкым шуарш полша. Мый волейбол дене модаш кумылан улам. Тудо тӱнямбалне ик эн тале спортын видшылан шотлалтеш. Волейбол дене визымше ий модам. Арнялан вич гана тренировкыш коштам. Ты спортлан Владимир Аркадьевич Александров шӱмаҥден. Тудо тунемше-влакым ончыко лӱдде ошкылаш, сеҥымашке шуаш кумылаҥден мошта.
Ты спортышто мечым чын пуэн моштыман, сайын тӧрштылман, кӧргӧ вий-куатан да писе лийман. Ме школысо команде дене тӱрлӧ таҥасымашке лекташ тыршена. Школын чапшым район, республик кӱкшытан таҥасымаште аралена. Ятыр гана чапкагаз, кубок да медаль-влак дене палемдалтынна. Умбакыжымат шке лӱмнернам кӱшнӧ кучаш, профессионал улмынам ончыкташ ямдылалтына.
Саша моло ӱдыр-рвезе-влакланат спорт дене таҥ лияш темла. Вет мотор, таза капкылан, ушан лияш, спорт эн ӱшанлын полша.
