Шукерте огыл Волжский район Сотнур школышто тунемше 12 йоча (латиктынже 9-ше классыште тунемыт) Краснодар крайысе Анапа олаште верланыше «Смена» лагерь гыч пӧртылын.
Нуно волейбол, баскетбол, ӱстембал теннис да спортын моло видше денат заниматлат. Анапыште Российысе президент таҥасымаште шке вийыштым тергеныт. Тушко каяш кодшо ийысе эше ик сеҥымашышт – баскетбол дене 1-ше вер – полшен. Такшым нуно Волжский районысо ДЮСШ-н воспитанникше улыт. Команде 34-ше верыш лектын, Александр Иванов многоборье дене 1-ше верым налын, Алёна Чапишева – тиде вид денак 3-шо верым. Вуйлатышышт – М.С.Тимофеев ден С.Н.Иванов.
А тылеч ончыч ноябрьыште ты школын рвезыже-влак Ставрополь крайысе Ессентуки олаште призыв деч ончычсо самырык-влакын спартакиадыштышт участвоватленыт. Тушто Сотнур школын командыже 85 кундем коклаште кумшо верым налын. В.Дмитриев Российын абсолютный чемпионжо лийын. Тыгодымак А.Митяков личный зачётышто 8-ше вер дене палемдалтын, С.Петров 60 метрыш да 100 куржмаште – 1-ше вер дене, кужытыш тӧрштылмаште – 2-шо вер дене.
Ятыр выпускник военный корно дене каен. «СОБР» клубын членже-влак кызыт Украиныште шке порысыштым шуктат, а кок еҥжын, Максим Микутов ден Руслан Александровын, тусо сӧйыштӧ ӱмырышт лугыч лийын.
