Донецк да Луганск калык республикла гыч Марий Элыш толшо икымше тӱшка калыкым вашлийме нерген «Единый Россий» партийын марий кундемысе пӧлкажын секретарьже Евгений Кузьмин увертарен:
‒ Республикыштына «Единый Россий» партий да Марий Эл правительстве дене пырля оперативный штаб ышталтын: МЧС, медицине, социальный да моло службымат ты пашашке ушымо, Донецк, Луганск кундем гыч толшо-шамычым вашлияш чыла ямдылыме. 25 февральыште Марий Элыш 310 еҥ толшаш. Нунылан илаш кызытеш кум учрежденийыште верым ойырымо: «Авангард» военно-патриотический, «Журавушка» социал да реабелитаций рӱдерлаште, Куярысе спортбазыште.
Толшо-влак коклаште тӱрлӧ ийготан лийыт: икшыве-влак авашӧрым кочшыжат, йочасадыш, школыш коштшыжат улыт, нунылан тунемаш йӧным пуыман. Вийвал ӱдырамаш-шамычлан пашам муаш полшыман. Илалше-влакат улыт.
Калык деч иктым гына йодмо шуэш: нелылыкыш логалше-влакым умылаш, кертме семын полшаш кӱлеш. Окса, кочкыш, вургем полышым пуэн кертыда. Тидын шотышто «Единый Россий» партийын общественный приемныйжо пелен волонтер рӱдер пашам ышта.
Донецк да Луганск калык республик-влаклан эрыкым пуымо дене тусо калыклан шуко ий дене чытыме нелылыкым сеҥаш кугу ошкылым ыштыме. «Единый Россий» президент Владимир Путин дене пырля ‒ эреак тыныслык верч!
Волонтер-влак штаб Йошкар-Оласе Мер-политик рӱдерыште 9 гыч 18.00 шагат марте пашам ышта. Полышым пуымо шотышто чыла йодышым 8(8362) 63-00-39 номеран телефон дене рашемдаш лиеш. Волонтер-влак рӱдер тыгак Йошкар-Оласе Самырык-влакын полатыштышт пашам ышта.