Йошкар-Оласе образований управленийыште школлаште пытартыш йыҥгырым эртарыме кече дене палдареныт. 9-ше классым тунем пытарыше-влаклан 21 майыште пытартыш йыҥгыр йоҥга, а 11-ше классын выпускникыше-влаклан – 25 майыште.
Йӱла почеш пытартыш йыҥгыр кечын торжественный линейке эрта, икымше да латикымше класслам тунем пытарышылан концерт лиеш. Тиде ийын пандемийлан кӧра Роспотребнадзор мероприятийыш толшо-влакын чотышым 50 еҥ марте шагалемдаш темла. Тидын деч посна образований управленийыште школым тунем пытарыше-влакын ача-аваштым да йолташыштым пайрем линейкыш ӱжаш огыл манын темленыт. Садлан пайрем годым мыняр еҥ лийшаш шотышто рашлык але уке.
Валентина Семёнова.