Ий еда октябрь тӱҥалтыште Морко район Арын школышто Марий Эл Республикысе образованийын сулло пашаеҥже Анатолий Иванович Степанов лӱмеш куржталмаш дене районысо Первенстве эртаралтеш. Йӱлаш пурышо куржталмаш тений спортым йӧратыше-влакым луымшо гана пырля чумырен. Тышке Морко, Марий Турек, Шернур, Параньга, У Торъял районла гыч 80 наре спортсмен толын.
Тӱрлӧ ийготан спортсмен-влак тӱрлӧ кутышан дистанцийыште вийыштым тергеныт. Изирак да тунемше-влак 1 да 2,5 меҥгым, кокла ийготан-шамыч 5 меҥгым, ветеран-шамыч 2,5 меҥгым куржыныт. Кажне тӱшкаште сеҥыше-влак диплом, медаль да тӱрлӧ пӧлек дене палемдалтыныт.
Анатолий Иванович Степанов (1945-2010) ятыр ий Арын кыдалаш школышто физкультурым туныктен, директор лийын . 7 спорт мастерым, 12 спорт мастерыш кандидатым да икымше разрядан ятыр спортсменым куштен.
