Теҥгече, 24 августышто, ме, «Кугарня» газетын пашаеҥже-влак, Марий Турек район Сардаялыш мийышна.
Школышто у полатым чоҥымо паша, 1 сентябрьлан ямдылалтме нерген йодыштна. Вара ял покшелне «Мый Сардаялым йӧратем» шонымаш дене ыштыме «Сардаял» манын возыман мотор арт-объект, Сарда эҥер воктене сниматлалтна.
Сылне арт-объектым ты ялын чолга марий пӧръеҥже Василий Иванович Николаев (снимкыште)
шке оксаж дене (15 тӱжем теҥгем тӱлен) кум ий ончыч Москосо ик печатный заводышто ыштыктен. А шкеже ты жапыште Москосо вес заводышто слесарьлан пашам ыштен. Букваже-влакым кугу сумкаш оптен, автобусыш шинчын да шочмо ялже марте конден.
Кажне шошым тушан шкеак пеледышым ӱда, кеҥеж мучко вӱдым шава, шӱкым кӱреш…
Тиде арт-объект тыште илыше ден уна-влаклан путырак келша. Василий Иванович семын ялым тӱзаташ полшышо-влак моло вере улыт мо, палдарыза.
А Сардаял школ илыш нерген 27 августышто лекше номерыште лудса.