17 августышто Российысе Инвалид-влак обществын Марий Элысе организацийжым ыштымылан 33 ий темын.
Тылеч посна тений республикысе организаций вич ияш пашажым иктешлен. Ты шотышто отчёт да сайлыме конференцийым июнь мучаште эртареныт. Правленийым вуйлаташ угыч Наталья Богомоловалан ӱшаненыт.
Тений эн ончыч ола ден районласе организацийлаште конференций-влакым эртарыме. Тушто вуйлатыше, президиум-влакым, тӱрлӧ пашалан вуйын шогышо еҥ-влакым ойырымо. Килемар, Медведево, Шернур, Кужэҥер, Марий Турек районлаште да Йошкар-Олаште председатель-влак вашталтын огытыл. Волжский районышто у председательым, Марсель Гайнановым, сайлыме, Морко районышто – Марина Васильевам. Тений Юрино, Звенигово да У Торъял районлаште кум организаций ешаралте. Кызыт ынде учётышто республикыште илыше 6450 инвалид уло.
Марий Элыште инвалидность шотышто пенсийым 62409 еҥ налеш.
Вич ийыште могай кӱкшытыш шумо, могай проект-влак почеш пашам вораҥдарыме нерген Наталья Евгеньевна уло кумылын каласкалыш — тидын нерген «Кугарня» газетын 20 августысо номерыштыже лудса.
СНИМКЫШТЕ: «Я и моя семья» конкурс годым Йошкар-Ола гыч Раджабовамыт.