Афганистан

Афганистанысе сарыште 14 тӱжем наре совет салтак ден офицер вуйыштым пыштеныт, 25 тӱжем утла еҥ сусырген, ятырын инвалидыш савырненыт. Тушто Марий Элысе 3 тӱжем утла салтак  лийын, 70 еҥын ӱмыржӧ кӱрылтын.

15 февральыште Российыште Воин-интернационалист-влакым шарныме кече палемдалте. Лач 32 ий ончыч, 1989 ий 15 февральыште, Афганистан гыч совет войска-влакым лукмо. Тусо кредалмаште Марий кундемын шочшыжо-влакат интернациональный порысыштым шуктеныт, южышт тушанак вуйыштым пыштеныт.

Ты кечын Йошкар-Олаште Воин-интернационалист-влаклан мемориал воктеке 150 утла еҥ, йӱштым ончыде, лектын. Памятник воктеке афганец-влак да нунын родо-тукымышт пал гвоздикым пеледышым пыштеныт, Афганистаныште лийше совет салтак-влакын подвигыштым шарналтеныт. А 14 февральыште Сеҥымашын ХХХ идалыкше лӱмеш тӱвыра полатыште нунылан пӧлеклалтше концерт лийын.

Афганистан. Ты шомакым ойлымо годым ме чынжымак тушто 10 ий шуйнышо (1979-1989 ийла) сар нерген шарналтена. Тушеч шукынжо сусыргышо пӧртылыныт. Йошкар-Олаште шочшо Ильфат Мухаметшин Афганистаныште ик ият шым тылзе служитлен. Тудын воктеч ятыр гана пуля шӱшкен эртен, 12 кугу лӱйкалымашыш логалын, полк гыч вес верыш 22 гана кудалыштын. Пиалешыже, Юмо але илыш пӱрымаш Ильфат Кашафовичым сусыргымо да колымаш деч утарен.