Йошкар-Олаште илыше Галина Николаевна Полякова 2 августышто 102 ий теммым палемден.
Тудо Марий Турек район Луковниково ялеш куд шочшан ешеш шочын. Ача-аваже илыш гыч ондак каеныт. Галина 7 классым гына тунем шуктен, тунеммашым кодаш да изирак йоча-влакым ончаш, суртсомылкам ышташ полшаш логалын. 1941 ийыште сар тӱҥалмеке, 17 ияш ӱдыр Озаҥышке аралалтме рубежым чоҥымашке каен. Вара Сеҥымаш кече марте Марий Турек райнысо селалаште ялозанлык пашам шуктен: куралын, ӱден, шурным поген. Сар мучашлан, бухгалтер курсым пытарен, шке рпайонысо Алексеевский йочапӧртыштӧ профессийже дене ыштен.
1946 ийыште Владимир Петрович дене палыме лийын. Тудо уло сарым эртен, кум ӱдырым ончен куштеныт. 1961 ийыште еш Медведево районысо Куяр посёлкыш илаш куснен, ныл ий гыч – Йошкар-Олашке. Галина Николаевна шуко жап войсковой частьыште бухгалтерлан ыштен, пелашыже – Марий машиностроительный заводышто столярлан.
Кызыт Галина Николаевна Надежда изирак ӱдыржӧ дене пырля ила. Кум ӱдыржӧ, ныл уныкаже, вич кугезе уныкаже тудым пагалат, йӧратат.
Шочмо кечыж дене Галина Поляковам Марий Эл Республикын паша да социальный аралтыш министрын алмаштышыже Наталья Ярукова саламлен, Россий Президент да Марий Элым Вуйлатыше деч саламлымаш открыткым, пеледышым да шарнымаш пӧлекым кучыктен.