Йошкар-Олаште илыше Наталья Петровна Порфирьевалан 21 сентябрьыште 101 ий темын.
Тудо Татарстан кундем Кайбицкий районысо Сосновка ялыште шочын. Шуко шочшан ешыште межнеч икшыве лийын. Ача-ава колхозышто тыршеныт. Ӱдырын илышыштыже кугу верым Петр изаже налын, тудо шӱжаржым арален наледен, пеленже кол кучаш коштыктен. Но Кугу Отечественный сар годым фронтыш каен да тушто колен.
Сар деч ончыч Наталья Петровна кӱртньыгорным ачалымаште тыршен. Сар тӱҥалмеке, 16 ияш ӱдыр Юдино посёлкысо эмлымверыш санитаркылан пашам ышташ каен, медшӱжар-влак курсым тунем лектын.
1947 ийыште марлан лектын, кум йочам ыштен. Но пеш ондак тулык ватеш кодын да йоча-влакым шкетынак ончен.
1970 ийыште ӱдырамаш икшывыже-влак дене Йошкар-Олашке илаш куснен, пенсийыш лекмешкыже, Марий машиностроительный заводышто электропогрузчикыште пашам ыштен. Пенсийыште вич уныкам ончаш полшымылан да сад-пакча сомыллан жапым пӧлеклен. Изажым шарнен, колымат кучаш коштын.
Шочмо кечыж дене Наталья Петровнам Йошкар-Оласе Комплексный рӱдерын еҥже-влак саламленыт. Тудлан Россий Президент Владимир Путинын да Марий Элым Вуйлатыше Юрий Зайцев деч саламлымашым, тыгак шарнымаш пӧлекым кучыктеныт.
Марий Элысе Паша да социальный аралтыш министерствын сайтше гыч налме фото.