2022 ий годсек 40 ялысе почто пӧлкам ачалыме, 2030 ийлан эше 102 почтым тӧрлатышаш улыт. Лишыл кок ийыште 41 пӧлкам уэмден шукташ палемдыме.
Ты сомылым Россий Президент В.Путинын инициативыж почеш почто инфраструктурым вияҥдыме программе дене келшышын шукташ тӱҥалыт.
Ончыкылык паша нерген Марий Элым Вуйлатыше Юрий Зайцевын Почто связьын федеральный управленийжын директоржо Андрей Виногоров дене мутланымеке рашемын.
Республикым Вуйлатыше Россий Почтын социальный кӱлешлыкше нерген палемден, поснак торасе населённый пунктлаште.
– Цифровой технологий саманыште почто связьын миссийже вашталтде кодеш – кужытым ончыде, еҥ-влакым да посна кумдык-влакым ушен шога. Селаште почто социальный ден кугыжаныш услугым пуышо рӱдерыш савырнен. Россий Почто дене СВО кайыме верлашке посылкым оксам тӱлыде колтат. Геройна-шамычлан мӧҥгышт гыч тыгай увер моткочак кӱлешан, – палемден Юрий Зайцев.
Андрей Виногоров республикым Вуйлатышылан полшымыжлан тауштен. 2025-2026 ийлаште Марий Элысе УФПС-ым кусараш лийдыме пого ден транспорт налог деч закон почеш утарыме. 2025 ийыште 6 млн теҥгеаш налог преференцийым почто пӧлкаште пашам ыштыше-влакын пашадарыштым кугемдаш колтымо.
Марий кундемысе почтылаште 1200 утла еҥ пашам ышта. Чылаже 5 почтамт ден 257 отделений улыт, тышеч 193 – ялыште.
Марий Эл «Земский почтальон» конкурсыш йодмашым колтымо шотышто ик эн ончыл верым айла. Тидыже «Единый Россий» партий дене пырля эртаралтеш.
Мӱндыр яллаште илыше-влаклан земский почтальон, райрӱдыш лекде, почто услугым пуа. Кодшо ийын Российысе конкурсышто почто пашаеҥ Ольга Швецова 12-шо верым налын.
2025 ийыште УФПС 7 млн утла серыш ден бандерольым, тыгак 300 тӱжем посылкым колтен, тышеч 600-жым – специальный военный операций зоныш. Почтальон-шамыч 4,5 млн экземпляр савыктышым да коммунал услугылан 7,7 млн квитанцийым адресат деке намиеныт.
А пенсий ден пособий-влакын кугытышт 800 тӱжемыш шуын: 55 тӱжем пенсионерлан 15 млрд утла теҥгем пуэденыт.