1 июль гыч Йошкар-Олаште йӱштылмӧ пагыт почылтеш. Тидын шотышто мэрын пунчалже лектын. Изи Какшан эҥер серысе «Южный» (Ширяйково), Вантовый кӱвар воктенысе пляжлаште, Нолька ял тураште йӱштылаш лиеш. А теве «Динамо» стадион, Константинов лӱмеш руш академический драме театр , Тумер алан воктене да моло верлаште вӱдыш пураш чарыме.
Пляж да утарыше-влакын постышт 9 гыч 20 шагат марте пашам ышташ тӱҥалыт.
Йӱштылмӧ тургым 9 августышто петыралтшаш.
Козьмодемьянскыште йӱштылмӧ пагытым 21 июньышто почаш палемдыме. Тылеч ончыч 8 июньыштак почылтеш манын увертарыме ыле. Но кызытеш республикыштына тӱшка дене нимогай мероприятийыш чумыргаш ок лий.