✍🏻Марий Эл Правительстве Председательын алмаштышыже – тӱвыра, печать да калык-влакын пашашт шотышто министр Константин Иванов у вуйлатыше-влакым шогалтыме шотышто икмыняр приказыш кидшым пыштен:
Але марте Республикысе тӱвыра да сымыктыш колледжым вуйлатыше Алексей Паскичевым Республикысе Я.Эшпай лӱмеш филармонийым вуйлаташ шогалтыме. А 2020 ий гыч ты филармоний директор Андрей Пуртов Марий самырык театрым вуйлаташ тӱҥалеш.
8 ий Т.Евсеев лӱмеш национальный тоштерыште директорлан тыршыше Светлана Зверева ынде Республикысе И.С.Палантай лӱмеш тӱвыра да сымыктыш колледж вуйлатышын пашажым жаплан шукташ тӱҥалеш. А ты тоштерым Ирина Якаевалан вуйлаташ ӱшаныме. Тудын але марте вуйлатыме Марий тӱвыра рӱдерлан ынде Александр Бирюков вуйын шогаш тӱҥалеш.
Нуно чыланат 1 апрель гыч шке пашаштым шукташ тӱҥалыт.
«Чыла тиде мемнан тӱвыра тӧнеж-влакын паша лектышыштым вияҥдаш да органиазаций-влак коклаште кылым пеҥгыдемдаш, пашашке у шонымаш-влакым пурташ ышталтеш», — палемден Константин Иванов.