Республикыштына СВО участник-влаклан чат-бот пашам ышташ тӱҥалын. Презентацийже кодшо арнян Марий Эл Кугыжаныш Погынышто эртаралтын.
Тудын инициаторжо – спецоперацийын участникше, Кугыжаныш Погын председательын алмаштышыже Александр Смирнов. А программын авторжо – Сергей Якунин.
– Кажне депутатлан еҥ-влак дене вашлиймыж годым СВО участник-влак да нунын ешышт шотышто йодышым пуат. Вашмутым муаш эреак вигак ок лий. Сандене ончылгоч кагазыште методичкым ямдыленна. Но единый цифровой платформо кӱлын. Тыге чат-ботым ыштыме нерген шонымаш шочын, – ойлен Александр Смирнов.
Депутатын мутшо почеш, «ОНАР» проект кок цифровой форматыште вияҥеш, тидыже шукырак еҥым авалтен кертеш. Икымше формат – MAX мессенджерыште ИИ-чат-бот (тушко ссылке – max.ru/onar_gorsobr_rme_bot). Кокымшо – VK Mini App, тудо «ВКонтакте» соцкылыште верланен. Депутат Смирновын интернет-приёмныйжат тыгаяк сынан (vk.com/deputat_smirnov_aa).
Йӧнан сервисыште кнопкым темдалын, менюш пураш да тӱрлӧ полыш категорий ден мерам ончен каяш лиеш. Тыгак йодышым пуэт гын, цифровой оператор сомылым искусственный интеллект шукта, тудым иктешла, кӱлеш уверым муэш да вашмутым пуа. Тыгай йӧн цифровизацийым сайын палыше да тыглай мутланымашлан тунемше еҥланат келша.
Тачысе кечылан «ОНАР» чат-бот официальый верификацийым эртен да республикыштына MAX мессенджерыште улшо вич верифицированный чат-бот радамыш пура.
Чат-бот ден мини-приложений ончыкыжымат вияҥыт. Кажне арнян туддене пайдаланыше-влак шотышто иктешлымаш ышталтеш, вашмут-влакым аклат да варажым уш-акылжым саемдаш тӱҥалыт.
«ОНАР» – цифровой ӱшанле полышкалыше, сутка мучко пашам ышта, тӱрлӧ задачым решатлаш полша.
Кугыжаныш Погынын фотожо-влак.